Paxtachi tumanida sodir etilgan ogʻir tan jarohati yetkazish jinoyati keng jamoatchilik ishtirokida muhokama etildi
2025-05-16 11:00:00 / Yangiliklar
Paxtachi tumanining Mojar mahallasida jahl-gʻazab tufayli bir oila boshiga musibat tushdi. Voyaga yetmagan yoshlar jahlga berilib bu oʻzaro janjalga aylanib ketadi. Natijada esa bir inson umri xazonga aylandi.
Bu ayanchli voqelik yuzasidan tumanning Toma mahallasidagi 1-umumtaʼlim maktabida tuman hokimligi, jamoatchilik vakillari va mahalla mutasaddilari ishtirokida muhokama yigʻilishi oʻtkazildi.
Unda viloyat Ichki ishlar boshqarmasi boshligʻi Rahmat Mamatov ishtirok etib, roʻy bergan jinoyatni keltirib chiqargan sabablar, bu kabi salbiy holatlarning oldini olish borasida soʻz yuritdi.
Muhokamada mahalla yettiligi faoliyatida sustkashlikka yoʻl qoʻyganligi aytilib, endilikda ishni hamkorlikda toʻgʻri tashkil etishi yuzasidan koʻrsatmalar berildi.
Mahalla faollari, jamoatchilik vakillarining fikr-mulohazalari eshitilib, tumanda jinoyatchilik va huquqbuzarliklarning oldini olish, oilaviy nizolarga barham berishda qilinadigan ishlar belgilab olindi.
Samarqand viloyati IIB Axborot xizmati