Ayol va jamiyat. Xizmatni xolis qilgan olisga yetar
2025-05-15 23:00:00 / Yangiliklar
Xotin-qizlarning huquq va manfaatlarini taʼminlash, ijtimoiy-siyosiy faolligini oshirish yangi Oʻzbekiston taraqqiyot strategiyasining muhim yoʻnalishlaridan biri hisoblanadi.
Ichki ishlar organlarida salkam chorak asrdan buyon turli lavozimlarda xizmat qilib kelayotgan Bekobod tumani 11V xotin-qizlar masalalari boʻyicha katta inspektori, podpolkovnik Nodira Qosimova ham xotin-qizlarga nisbatan zoʻravonlikning oldini olish, ularning huquqiy manfaatlarini taʼminlashga munosib hissasini qoʻshib kelmoqda.
Gender tenglikka erishishda barqaror rivojlanish maqsadlarini amalga oshirish, xotin-qizlarga nisbatan zoʻravonlikning oldini olishda davlat va fuqarolik institutlarining hamkorligini mustahkamlash, oilalardagi maʼnaviy-axloqiy muhitni yaxshilash yoʻlida barchamiz birdek harakat qilmogʻimiz lozim, — deydi fidoyi xodima.
Lavhamiz qahramoni xotin-qizlar masalalari borasida tumanda 2019-yildan buyon xizmat qilmoqda.
Bugungi kunda u oʻz yoʻnalishi boʻyicha mahallalardagi holatlarni oʻrganib, uni har tomonlama tahlil qilib boradi. Oilaviy sharoiti ogʻir, ijtimoiy himoyaga muhtoj xotin-qizlar bilan koʻproq ishlab, ularning bandligini taʼminlashga ham harakat qiladi. Ehtiyojmandlarga onalarcha, opalarcha mehr koʻrsatib muammolariga quloq tutadi.
Jumladan, oʻtgan yili xotin-qizlar uchun 11 marotaba mehnat yarmarkalari oʻtkazilib, ulardan 43 nafarining bandligi taʼminlangan, 110 nafari kasb-hunarga oʻqitishga yoʻnaltirilgan.
Joriy yilning birinchi choragida esa 6 marotaba mehnat yarmarkalari tashkil etilib, 29 nafar xotin-qiz ish bilan taʼminlangan, 34 nafari kasb-hunarga oʻqitishga yoʻnaltirilgan.
Yana bir eʼtiborli jihati shundaki, oʻtgan yil yakunlariga koʻra, tumanda xotin-qizlar oʻrtasidagi jinoyatlar soni 2023-yilga qaraganda ikki barobarga kamayishiga erishilgan.
Bugungi kunda tuman hududidagi 51 ta mahallaga borilib, ijtimoiy himoyaga muhtoj xotin-qizlarga huquqiy-psixologik va tibbiy yordamlar koʻrsatilmoqda.
Podpolkovnik Nodira Qosimova ikki qizni tarbiyalab voyaga yetkazmoqda. Katta qizi Sevinch Qosimova IIV qoshidagi 2-sonli Toshkent akademik litseyida tahsil olgan.
Hozirda IIV Akademiyasida tahsil olishni maqsad qilib astoydil bel bogʻlagan. Kichkina qizi Sabohat esa sportning oʻzbek jang sanʼati turidan musobaqalarda ishtirok etib, sovrindorlar safidan joy olib kelmoqda.
©️ “Postda” gazetasi, Abror Poyonov, Toshkent viloyati.