Buxoro viloyati Shofirkon tumanida jinoyatchilikka barham berish, kriminogen vaziyatni barqarorlashtirish borasida amalga oshirilayotgan keng qamrovli tezkor hamda profilaktik tadbirlar, manzilli chora-tadbirlarning natijadorligi joyiga chiqib oʻrganildi
2025-05-15 09:00:00 / Yangiliklar
Buxoro viloyatining Shofirkon tumanida jinoyatchilikka chek qoʻyish, kriminogen vaziyatni barqarorlashtirish hamda jamoat tartibini taʼminlash borasida amalga oshirilayotgan keng qamrovli profilaktik va tezkor chora-tadbirlar samaradorligi oʻrganildi.
Bu jarayon Oʻzbekiston Respublikasi Prezidentining 2025-yil 3-yanvar kuni qabul qilingan “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish chora-tadbirlari toʻgʻrisida”gi Qarori hamda Vazirlar Mahkamasining 801-sonli qarori ijrosini taʼminlash maqsadida tashkil etildi.
Oʻrganish ishlari Qalmaqon va Bobohaydar mahallalarida “yettilik” tarkibidagi mutasaddilar ishtirokida oʻtkazilib, mahallalardagi jinoyatchilik holati, “Namunali xavfsiz koʻcha” va “Namunali xavfsiz yoʻlak” loyihalari doirasida amalga oshirilgan ishlar, mavjud muammolar va kamchiliklar tanqidiy muhokama qilindi.
Shu bilan birga, “Buxoro tajribasi” asosida profilaktika katta inspektorlariga ajratilgan uchuvchisiz uchish apparatlaridan (dronlardan) foydalanish amaliyoti va dastlabki natijalar ham tahlil qilindi.
Bobohaydar mahallasida joylashgan 18-son umumiy oʻrta taʼlim maktabida oʻquvchilarning xavfsizligi, davomati, vatanparvarlik ruhida tarbiyasiga qaratilgan ishlar, mavjud shart-sharoitlar oʻrganildi.
Oʻrganishlar yakunlari boʻyicha oʻtkazilgan yigʻilishda joriy yil mart oyida Ichki ishlar vazirligi ishchi guruhi tomonidan oʻtkazilgan kompleks inspektorlik tekshiruvi natijalari muhokama qilindi.
Tadbir davomida aniqlangan kamchiliklarni bartaraf etish yuzasidan manzilli topshiriqlar berildi. Shuningdek, “Xavfsiz va sogʻlom yurt” hamda “Qoradori — 2025” dasturlari doirasida amalga oshirilgan ishlar natijalari koʻrib chiqildi.
Yakunda xizmat faoliyatida salbiy koʻrsatkich qayd etgan xodimlarga nisbatan intizomiy taʼsir choralari qoʻllanildi, yuqori natijaga erishgan 5 nafar xodim esa ragʻbatlantirildi.
Shu bilan birga, shaxsiy tarkib oʻrtasida xizmat va ijro intizomini mustahkamlash, qonunbuzarliklarning oldini olish boʻyicha tushuntirish va ogohlantirish ishlari olib borildi.
Tadbir yakunida aniqlangan muammolarni hal etish boʻyicha berilgan topshiriqlar ijrosi qatʼiy nazoratga olindi.
Bunday profilaktik va tahliliy tadbirlar Buxoro viloyatining boshqa shahar va tumanlarida ham tizimli ravishda davom ettirilmoqda.
Buxoro viloyati IIB Axborot xizmati