IIV Akademiyasini 20 yil avval tamomlagan bitiruvchilar bilan xotiraviy uchrashuv tashkil etildi
2025-05-14 13:45:00 / Yangiliklar
Qalblarga muhrlangan dargoh. Biz uchun ustozlarimiz qanchalik tabarruk boʻlsa, taʼlim olgan maskanimiz ham shunchalik qadrli. Shundan boʻlsa kerak, yillar oʻtsa-da, hayot saboqlarini olgan dargohni aslo unutmaymiz...
Ichki ishlar vazirligi akademiyasi ushbu maskanda taʼlim olgan, el-yurt osoyishtaligi yoʻlida xizmat qilgan va ayni paytda oʻz burchini sharaf bilan oʻtayotgan har bir inson uchun ana shunday dargoh sanaladi.
Shonli tarixga ega maskanda oʻtgan yillar mobaynida ezgu anʼanalar shakllandi. Akademiya yetuk salohiyatli kadrlar tayyorlaydigan, yosh avlodni yuksak maʼnaviy-axloqiy fazilatlar egasi etib tarbiyalaydigan vatanparvarlik maktabiga aylandi.
Kuni kecha oʻquv dargohi bitiruvchilari oʻzlari uchun qadrdon maskanda yigʻildilar. Yigirma yil oldingi xotiralarni yodga solgan tadbir qiziqarli taassurotlarga boy boʻldi.
Bitiruvchilar saf maydonidan tantanali marsh bilan oʻtib, navqiron damlari oʻtgan oʻquv binolarida boʻldilar. Ustozlari bilan hamsuhbat boʻlib, oʻtgan yillar mobaynida erishgan yutuqlarini soʻzlab berdilar. Olgan saboqlari, hayotiy tajriba va oʻgitlari uchun ularga minnatdorlik izhor qildilar.
Maʼnaviyat va maʼrifat markazida badiiy havaskorlik jamoalari tomonidan namoyish etilgan qiziqarli sahna koʻrinishlari, hazil-mutoyibalar, joʻshqin kuy-qoʻshiqlar barchaga koʻtarinki kayfiyat ulashdi. Ayniqsa kursantlar oshxonasidagi tushlik bitiruvchilar uchun kutilmagan tuhfa boʻldi.
– Men shunday ulugʻ dargohda oʻqiganimdan doimo faxrlanaman. Chunki, ushbu maskan bizni chinakam inson etib tarbiyaladi, hayotda oʻz oʻrnimizni topishimizda mustahkam tayanch boʻldi. Bir jihatni aytishim joiz: akademiyaga qadam qoʻyganimizga 24 yil boʻlganiga qaramay, hali ham kursdoshlar ahil-inoqmiz, bir-birimizni yoʻqlab turamiz. Buning zamirida ustozlarimiz bergan tarbiya, qalbimizga muhrlagan mehr-oqibat tuygʻulari bor, – deydi podpolkovnik Mehriddin Eshnazarov.
Shu kuni bitiruvchilar akademiya boʻylab sayohat qildilar. Taʼlim jarayonidagi yangilanishlar, kursant-tinglovchilar uchun yaratilgan zamonaviy sharoitlar bilan tanishib, sohadagi ulkan islohotlar samarasiga guvoh boʻldilar. Hayotdan erta koʻz yumgan safdoshlari, marhum ustozlarini xotirlab, yosh avlod vakillariga oʻz maslahatlarini ulashdilar.
IIV akademiyasi Axborot xizmati