O‘zbеkiston Rеspublikаsi Ichki ishlаr vаzirligi

- «Xavfsiz shahar» tizimi — xavf-xatarlarni, favqulodda vaziyatlarni, hodisalarni bartaraf etish boʻyicha chora-tadbirlarni kompleks boshqarish tizimi boʻlib, davlat tomonidan aholi hayoti va faoliyatini barcha tashqi tahdidlardan muhofaza qiladi, — deydi u. — Shuningdek, jamoat tartibini saqlash, fuqarolar hayoti va sogʻligini turli xavflardan himoya qilish, jismoniy va yuridik shaxslar mulkining ishonchli qoʻriqlanishini tashkil etish, huquqbuzarliklar profilaktikasiga qaratilgan jamoat xavfsizligini taʼminlash tizimida bir qator ishlarni amalga oshiradi.

Ichki ishlar vazirligi, Qoraqalpogʻiston Respublikasi Vazirlar Kengashi, Toshkent shahri va viloyatlar hokimliklari bilan birgalikda hududlarda «Xavfsiz shahar» yagona integratsiyalashgan tizimini yaratish va rivojlantirish yuzasidan yillik manzilli dasturlar ishlab chiqildi. Dastur ijrosi doirasida hududlarda tizimni joriy qilish uchun bosqichma-bosqich qurilmalar belgilangan manzillarda oʻrnatilib, ishga tushirilmoqda. Jumladan, oʻtgan yilning oxirigacha «Xavfsiz shahar» loyihasi doirasida 11 ming 243 ta turli yoʻnalishdagi kameralar oʻrnatildi. Mahallalardagi koʻp qavatli uylar, taʼlim, sogʻliqni saqlash muassasalari hamda ularga kirish-chiqish joylarida intellektual videokuzatuv kameralari qoʻyilib, hududiy ichki ishlar organlarining Tezkor boshqaruv markazlariga integratsiya qilinmoqda.

Shuningdek, doimo odamlar bilan gavjum boʻladigan bozorlar, madaniyat va istirohat bogʻlari, savdo markazlari, maydonlar, muzey, koʻngilochar maskanlar, mehmonxonalar va dam olish majmualarida shaxsni yuzidan tanib oluvchi kameralarni oʻrnatish hamda ularni hududiy ichki ishlar organlari va Milliy gvardiya boʻlinmalarining axborot tizimi bilan integratsiya qilish boʻyicha bir qator ishlar bajarilmoqda.

Eng muhimi, «Xavfsiz shahar» tizimining yagona apparat-dasturiy platformasi joriy etilib, Qoraqalpogʻiston Respublikasi, Xorazm, Buxoro, Navoiy, Surxondaryo, Qashqadaryo, Samarqand, Jizzax, Andijon, Fargʻona va Toshkent viloyatlarida test rejimida ishga tushirildi.

- Markaz erishadigan yutuqlar nimalarda namoyon boʻladi?

- «Xavfsiz shahar» loyihasi toʻliq joriy etilganidan soʻng, mazkur tizimlar orqali jinoyatchilik 30-40 foizgacha kamayishiga, foto va videomateriallar yordamida jinoyatlarning 40-50 foizgacha fosh etilishiga muvaffaq boʻlinadi.

- Mamlakatimiz turizm salohiyati rivojiga mazkur loyihalarning ahamiyati qanday?

- Xalqaro turizm amaliyotiga koʻra, sayohatchilar koʻpayishi va sayohat geografiyasi kengayishi bilan xavfsizlik choralariga rioya etish zarurati keskin ortadi. Shu sababli, Toshkent viloyati Boʻstonliq tumani «Chorvoq» erkin turistik zonasida «Xavfsiz turizm» loyihasi doirasida 140 ga yaqin obyektning videokuzatuv kameralari «Vaziyatlar markazi»ga integratsiya qilindi.

Shu bilan birga, yoʻllarda tirbandliklarning oldini olish uchun noqonuniy toʻxtash va toʻxtab turish qoidabuzarliklarini aniqlovchi, avtotransport oqimini hisoblovchi va davlat raqami belgisini aniqlovchi, tezlikni oʻlchovchi foto-video qayd etish hamda yongʻindan xabar beruvchi intellektual videokuzatuv qurilmalari oʻrnatilib, foydalanishga topshirildi. Bu esa, sayyohlar xavfsizligini taʼminlash, jamoat tartibi hamda yoʻl harakati qoidalari buzilishining oldini olish, voqea-hodisalarni uzluksiz kuzatib borish, muammoning bevosita boshlangʻich nuqtasidan xabardor boʻlish va bartaraf etishga xizmat qiladi. Oʻz navbatida, turizm sohasida xizmatlar koʻrsatuvchi va sayyohlar hisobini yurituvchi davlat hamda nodavlat tashkilotlarining yagona axborot bazasini shakllantirishda qoʻl kelmoqda.

- Ommaviy tadbirlarda qonunbuzarliklar qay tarzda bartaraf etiladi?

- Hukumat topshiriqlari asosida joylarda oʻtkazilgan tadbirlar uchun videokuzatuv tizimlari joriy etildi. Masalan, avvallari yurtimizdagi oliy taʼlim muassasalariga oʻqishga kirish uchun oʻtkaziladigan test sinovlarida turli noqonuniy holatlar kuzatilardi. Endilikda, test sinovlarining shaffofligi va haqqoniyligini taʼminlashga ham katta eʼtibor qaratilmoqda. Bu esa, abituriyentlar va ota-onalar koʻnglida sogʻlom raqobatga ishonch uygʻotdi. Shuningdek, mamlakatimizdagi eng muhim ijtimoiy va siyosiy tadbirlarda ham mazkur hududlarga videokuzatuv qurilmalari oʻrnatilib, jamoat xavfsizligini monitoring qilish va muvofiqlashtirish hamda Jamoat xavfsizligi xizmati situatsion-tahlil markaziga toʻliq integratsiya qilindi.

- Mahallalar va yoʻllardagi qoidabuzarliklarni aniqlash borasida amalga oshirilayotgan ishlar toʻgʻrisida ham toʻxtalsangiz?

- Mahallalardagi noxush vaziyatlarni kamaytirish, tinchlik-osoyishtalikni taʼminlash uchun bugun Namangan, Sirdaryo, Buxoro, Samarqand, Fargʻona, Toshkent viloyatlari hamda Toshkent shahri mahallalarida jami 1 ming 157 ta, shahar va tumanlarga kirish-chiqish obyektlariga avtotransport vositalarining davlat raqami belgilarini aniqlovchi 19 ta va yoʻl harakati qoidabuzarliklarini foto-video qayd etuvchi avtomatlashtirilgan tizim uchun 84 ta, toʻxtash va toʻxtab turish, belgilangan tezlikdan oshirilganlik uchun qoidabuzarliklarini aniqlovchi 9 ta kamera oʻrnatildi. Shu bilan birga, «Raqamli xavfsiz mahalla» konsepsiyasi doirasida Samarqand, Namangan, Fargʻona, Qashqadaryo viloyatlarida jami 790 ta, shahar va tumanlarga kirish-chiqish obyektlarida avtotransport vositalarining davlat raqami belgilarini aniqlovchi 71 ta kamera ishlab turibdi.

Qoraqalpogʻiston Respublikasi, viloyatlar va Toshkent shahrida hududiy yoʻl harakati xavfsizligi boshqarmalari tomonidan oʻrnatilgan yoʻl harakati qoidalari buzilishini foto va video qayd etuvchi hamda «Maʼmuriy amaliyot» kompleks avtomatlashtirilgan axborot tizimiga maʼlumotlarni uzatuvchi 407 ta kamera «Xavfsiz shahar» markazi tasarrufiga oʻtkazildi. 146 ta radar, 6 ta toʻxtash va toʻxtab turish qoidabuzarliklarini qayd etuvchi kameralar harakat xavfsizligi xizmatining «Maʼmuriy amaliyot KAAT» tizimiga integratsiya qilindi.

- Kelgusida yana qanday rejalarni amalga oshirish koʻzda tutilyapti?

- Yurtimiz boʻylab xavfsiz muhitni yaratish va huquqbuzarliklarning barvaqt oldini olish maqsadida Samarqand, Fargʻona, Qashqadaryo, Namangan va Toshkent viloyatlarining «qizil» toifadagi mahallalarida raqamlashtirish va intellektual videokuzatuv kameralarini oʻrnatish ishlari amalga oshirilmoqda. Jumladan, 1 373 ta «qizil» toifadagi mahallalarga 23 ming 328 ta ana shunday kameralar oʻrnatish rejalashtirilgan. Ayni paytgacha ularning 3 278 tasi oʻrnatilib boʻlindi. Shuningdek, «Raqamli xavfsiz mahalla» konsepsiyasi asosida Samarqand viloyatida 460 ta, Fargʻona viloyatida 216 ta, Qashqadaryo viloyatida 381 ta, Namangan viloyatida 410 ta, Toshkent viloyatida 65 ta yuzdan tanib olish, aylanma hamda avtotransport vositasining davlat raqamini aniqlash imkoniga ega boʻlgan intellektual videokuzatuv kameralari oʻrnatilib, bosqichma-bosqich integratsiyalash ishlari olib borilyapti.

Mixli Safarov, kapitan. “Postda”