Buxoro viloyati ichki ishlar organlarida yaqindagina oʻz faoliyatini boshlagan Voyaga yetmaganlar masalalari boʻyicha inspektor-psixologlar bilan uchrashuv oʻtkazildi
2025-05-11 09:00:00 / Yangiliklar
Oʻzbekiston Respublikasi Prezidentining “Ichki ishlar organlarining voyaga yetmaganlar oʻrtasida huquqbuzarliklar profilaktikasi faoliyatini tashkil etish boʻyicha qoʻshimcha chora-tadbirlari toʻgʻrisida”gi 2025-yil 18-martdagi PQ–110-son qaroriga muvofiq, Oʻzbekiston Respublikasi Milliy gvardiyasi hududiy boshqarma va boʻlimlari tarkibidagi voyaga yetmaganlar masalalari boʻyicha inspektor-psixolog lavozimlari Ichki ishlar organlariga oʻtkazildi.
Buxoro viloyati ichki ishlar boshqarmasi boshligʻi viloyatning hududiy ichki ishlar organlarida yaqindagina oʻz faoliyatini boshlab, takomillashtirish jarayoni olib borilayotgan ushbu tizim vakillari bilan toʻgʻridan toʻgʻri ochiq muloqot oʻtkazdi.
Ochiq va konstruktiv ruhda kechgan uchrashuvda dastlab, inspektor-psixologlarning faoliyati tahliliy muhokama qilinib, voyaga yetmagan yoshlar tomonidan sodir etilgan huquqbuzarlik va jinoyatlarning asl sabablari, ularning vujudga kelish omillari monitoring qilindi.
Yangi qabul qilingan qaror bilan viloyatda umumiy va kasbiy taʼlim muassasalarida oʻquvchilar bilan “Maktab – mahalla – oila” tamoyili asosida ishlash tizimini joriy etish, oʻquvchilar oʻrtasida qonunbuzilishi va boshqa koʻrinishdagi hulqiy ogʻishishlarga, ijtimoiy tarmoqning zararli kontentlariga, ommaviy madaniyat va yod gʻoyalarga qarshi immunitetni mustahkamlash, profilaktik-psixologik ishlash mexanizmlarini yoʻlga qoʻyish orqali Vatanga sadoqat, qonunlarga hurmat hissini shakllantirish, maktablarda davomat tadbirlarini manzilli oʻtkazish, oʻquvchilarning boʻsh vaqtlarini mazmunli tashkil etish, fan va kasbiy toʻgaraklarga yoʻnaltirish yuzasidan topshiriqlar berildi.
Shuningdek, darsdan keyingi inspektor-psixolog, Qoʻriqlash boʻlimi xodimi va profilaktika inspektori mahalla “yettiligi”, Bolalar Ombudsmani bilan hamkorlikda xonadonma-xonadon yurish asosida tarbiyasida salbiy oʻzgarish boʻlayotgan bolalarni aniqlab, oilalari bilan manzilli ishlash tizimini yoʻlga qoʻyish, umumiy va kasbiy taʼlim muassasalarini oʻquvchilarining oxirgi uch yil davomida sodir qilgan jinoiy qilmishlariga qarab “Qizil”, “Sariq” va “Yashil” toifalarga ajratgan holda alohida yoʻl xaritasi asosida manzilli ishlash, uzoq muddatda xorijda yurgan voyaga yetmaganlarni yashash manzillariga qaytarish, taʼlim muassasalarining ichki va atrofida xavfsizlikni toʻliq taʼminlash, muassasalarning kirish chiqish joylari, ochiq sport maydonlari, yuqori sinf xonalarini intellektual videokuzatuv kameralari bilan jihozlash yuzasidan ham tavsiya va koʻrsatmalar berildi.
Shu bilan birga, inspektor-psixologlarning mehnat va turmush sharoitlari yuzasidan mavjud muammolari ham oʻrganilib, ularga yechim topish yuzasidan tegishli sohaviy xizmatlar rahbarlariga zaruriy topshiriqlar ham berildi.
Yakunda, xodimlarga xizmat va ijro intizomiga hamda qonunchilikka qatʼiyan rioya qilish, fuqarolar bilan xushmuomalada boʻlish, xizmat vazifasini bajarishda xato va kamchiliklarga yoʻl qoʻymaslik, xizmatga taalluqli boʻlmagan ishlarga aralashmaslik, oʻz kasbiga sidqidildan yondashish, yoshlarning maʼnaviy-maʼrifiy saviyasini yuksaltirish, ularning zamonaviy bilim olishi uchun yaratilgan barcha imkoniyatlardan unumli foydalanishlari uchun sharoit yaratish, ularni vatanparvarlik va ona Vatanga muhabbat ruhida tarbiyalash, boʻsh vaqtini mazmunli tashkil etish borasida amalga oshirilishi lozim boʻlgan chora tadbirlar belgilab olindi.
Buxoro viloyati IIB Axborot xizmati