“Xavfsiz va sogʻlom yurt” tezkor profilaktik tadbirlari doirasida Koson va Muborak tumanlarida amalga oshirilgan ishlar tanqidiy-tahlil qilindi
2025-05-11 09:00:00 / Yangiliklar
Viloyat Ichki ishlar boshqarmasi boshligʻi polkovnik Abduvoxid Ismoilov ishtirokida “Xavfsiz va sogʻlom yurt” keng qamrovli tezkor profilaktik tadbiri doirasida Koson va Muborak tumanlarida amalga oshirilgan ishlar tanqidiy-tahlil etildi.
Polkovnik Abduvoxid Ismoilov har ikki tumanda oʻtgan davr mobaynida kriminogen vaziyatni jilovlash, mahallalarda xavfsiz muhitni yaratish, jamoat tartibini saqlash, xavfsizlikni taʼminlash hamda kriminogen vaziyatni barqarorlashtirish borasida ichki ishlar organlari xodimlari faoliyatini atroflicha tahlil qildi.
Yigʻilishlar davomida jinoyatlarning oldini olish, sodir etilganlarini fosh etish, giyohvandlik va boshqa illatlarga qarshi kurashish, tinchlik va osoyishtalikni taʼminlash, ijtimoiy profilaktikani kuchaytirish, jinoyat sodir etishga moyil va nazoratdagi shaxslar bilan manzilli ish olib borish, aholi gavjum joylarda – bozorlar, koʻngilochar maskanlar va savdo nuqtalarda jamoat tartibini saqlash yuzasidan amalga oshirilgan ishlar muhokama qilindi.
Masʼul xodimlar zimmasiga aniq vazifalar yuklatilib, ular ogohlantirildi. Shuningdek, tezkor tadbirlarni yanada kuchaytirish, fuqarolar osoyishta hayot kechirishlari uchun zarur shart-sharoitlar yaratish maqsadida bozorlar, choyxonalar, savdo doʻkonlariga videokameralar oʻrnatish ishlarini jadallashtirish, xodimlarning ishchanlik holatini muntazam tekshirib borish hamda mahalliy hokimliklar, korxonalar va tashkilotlar bilan, ayniqsa, mahalla yettiligi bilan hamkorlikni yanada kuchaytirish yuzasidan manzilli topshiriqlar berildi.
Qashqadaryo viloyati IIB Axborot xizmati