Oʻzbekiston Respublikasi ichki ishlar vaziri, general-mayor Aziz Tashpulatovning bayram tabrigi
2025-05-09 18:00:00 / Yangiliklar
Hayotini elu yurt tinchligi, osoyishtaligini saqlashdek ulugʻ va oliyjanob ishga bagʻishlagan, bu borada fidoyilik bilan xizmat qilib kelayotgan ichki ishlar organlarining barcha xodimlari va harbiy xizmatchilarini, faxriylar hamda xizmat burchini bajarish chogʻida halok boʻlgan xodimlarning oila aʼzolarini qutlugʻ ayyom – Xotira va qadrlash kuni hamda Ikkinchi jahon urushida qozonilgan buyuk Gʻalabaning 80 yilligi bilan samimiy tabriklayman.
Oʻtgan asrning eng mudhish urushida qahramonlarcha halok boʻlgan oʻgʻlonlar, shu bilan birga, oilasi bagʻriga sogʻ-omon qaytib, mamlakat ichkarisida mehnat qilgan fidoyi yurtdoshlarimizga boʻlgan hurmat va ehtirom hech qachon yoʻqolmaydi.
Istiqlol yillarida keksalarni qadrlash hayotimizning ajralmas qismiga aylandi. Keksa avlod vakillariga mehr-oqibat, gʻamxoʻrlik koʻrsatish, eʼzozlash kabi boqiy qadriyatlarimiz yanada yuksaldi.
Bu yilgi bayram tadbirlari yurtimizda “Vatan ravnaqi, tinchligi va himoyasi yoʻlidagi qahramonlik unutilmaydi” shiori ostida oʻtkazilayotganida ham katta maʼno mujassam.
Bugun barchamiz birgalikda yangi Oʻzbekistonni barpo etmoqdamiz. Yangi hayot, beqiyos oʻzgarishlar hammamizdan fidoyilik va bunyodkorlikni, yanada keng koʻlamli safarbarlikni taqozo etmoqda.
Yurtimizdagi tinchlik va osoyishtalikni taʼminlash yoʻlida mard, jasur ota-bobolarimizning Ikkinchi jahon urushi yillarida koʻrsatgan sabot va matonati biz uchun hamisha ibrat maktabi boʻlib xizmat qiladi.
Ushbu unutilmas ayyom bilan barcha yurtdoshlarimizni yana bir bor samimiy tabriklab, barchangizga sihat-salomatlik, baxt va omad, xonadonlaringizga fayzu baraka tilayman.
Vazir general-mayor
A. Tashpulatov