Qoraqalpogʻiston Respublikasida oʻtkazilgan sayyor qabullarda fuqarolar muammolariga yechim topilmoqda
2025-05-09 09:00:00 / Yangiliklar
Joriy yilning 6-10-may kunlari Respublika ishchi guruhi tomonidan aholining sud-huquq, ijtimoiy-iqtisodiy, qurilish va kommunal sohalardagi muammolarini oʻrganish va ularga amaldagi yechim topish maqsadida Qoraqalpogʻiston Respublikasida sayyor qabullar tashkil etildi.
6-may kuni Nukus shahridagi “Mono markaz” binosida Xoʻjayli, Nukus, Taxiatosh tumanlari va Nukus shahri fuqarolarining murojaatlari koʻrib chiqildi.
Shuningdek, 7-may kuni Qonlikoʻl tumani Ixtisoslashtirilgan maktab binosida Qonlikoʻl, Qoʻngʻirot, Moʻynoq va Shumanay tumanlaridan kelgan fuqarolar bilan uchrashuv oʻtkazildi.
Qabullarda Respublika ishchi guruhi aʼzosi, Oʻzbekiston Respublikasi Ichki ishlar vazirligi Tashkiliy departamenti boshligʻi oʻrinbosari, polkovnik Mahamadali Ismoilov hamda Qoraqalpogʻiston Respublikasi Ichki ishlar vaziri Baxtiyor Toʻrabekov ishtirok etib, fuqarolarning ichki ishlar organlariga oid murojaatlarini qabul qildi.
Murojaatlarning koʻpchiligi joyida ijobiy hal etildi. Qoʻshimcha oʻrganish talab etilgan masalalar boʻyicha aniq muddat belgilanib, ijrosi nazoratga olindi. Shu bilan birga, ayrim fuqarolarga huquqiy maslahatlar va zarur tushuntirishlar berildi.
Bu kabi sayyor qabullar aholi muammolarini joyida oʻrganish va yechim topishda muhim ahamiyat kasb etmoqda.
Qoraqalpogʻiston Respublikasi IIV Axborot xizmati