O‘zbеkiston Rеspublikаsi Ichki ishlаr vаzirligi

Rasmiy sahifalarimizda xabar berib borayotganimizdek, Buxoro viloyati Ichki ishlar boshqarmasi boshligʻi boshchiligidagi masʼullar bevosita hududlarda boʻlib, Oʻzbekiston Respublikasi Prezidentining 2025 yil 3 yanvar kunidagi “2025 yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish chora-tadbirlari toʻgʻrisida” gi Qarori ijrosini taʼminlash borasida amalga oshirilayotgan ishlarni joyiga chiqib oʻrganmoqda.

Xuddi shu maqsadda Romitan tumanida ham navbatdagi oʻrganishlar amalga oshirildi.

Dastlab, oʻtgan hisobot yilida “qizil toifa” ga kirgan Afrosiyob MFY da boʻlgan masʼullar, Amir Temur koʻchasida “Namunali xavfsiz koʻcha” va “Namunali xavfsiz yoʻlak” loyihalari doirasida amalga oshirilgan ishlarni joyiga chiqib koʻzdan kechirishdi. Shundan soʻng, mahalla binosida “yettilik” vakillari ishtirokida PQ-1-son hamda Oʻzbekiston Respublikasi Vazirlar Mahkamasining «Obod va xavfsiz mahalla» tamoyili asosida mahallalarda ijtimoiy profilaktika tizimi samaradorligini oshirish chora-tadbirlari toʻgʻrisidagi 801-sonli Qarorlari talablari asosida hududda kriminogen vaziyatni barqarorlashtirish borasida amalga oshirilayotgan profilaktik tadbirlarning natijadorligi, mavjud muammolar hamda yoʻl qoʻyib kelinayotgan tizimli kamchiliklar birma-bir muhokama qilindi.

Shuningdek, bugungi kunda “Buxoro tajribasi” asosida profilaktika katta inspektorlarining xizmat faoliyatida foydalanish uchun berilgan uchuvchisiz apparat (drondan) lardan foydalanish amaliyoti, dastlabki natijalar, ushbu qurilmaning afzalliklari va mavjud muammolar ham yaqindan oʻrganildi.

Oʻrganishlar yakunida odatdagidek, tuman hokimligida tezkor yigʻilish oʻtkazildi. Bunda joriy yilning 22-29 mart kunlari Oʻzbekiston Respublikasi Ichki ishlar vazirligi ishchi guruhi tomonidan Buxoro viloyatida olib borilgan kompleks inspektorlik tekshiruvi yakunlari yuzasidan oʻtkazilgan yakuniy yigʻilishda berilgan topshiriqlar ijrosi muhokama qilindi.

Tanqidiy-tahliliy, yuzma-yuz ochiq muloqot tarzida oʻtgan yigʻilishda, aniqlangan kamchiliklarni bartaraf etish yuzasidan sohaviy xizmatlar masʼullarining amalga oshirgan ishlari boʻyicha hisobotlari tinglandi.

Jarayonda, tumanda joriy yilning bugungi kuniga qadar qayd etilgan huquqbuzarlik hamda jinoyatlarning kelib chiqish sabablari, omil boʻlgan shart sharoitlar, jinoyatlarning turlari, sodir etgan shaxslarning toifalari kesimida chuqur tahlil qilinib, galdagi vazifalar belgilab berildi.

Shu bilan birga, Ichki ishlar vazirining alohida Farmoyishi asosida Respublikamiz boʻylab oʻtkazilayotgan “Xavfsiz va sogʻlom yurt” keng qamrovli tezkor profilaktik tadbiri doirasida Romitan tumanida amalga oshirilgan ishlar va natijalar ham birma-bir koʻrib chiqildi.

Yakunda, 2 nafar xizmat soha rahbarini egallab turgan lavozimidan ozod etish, bir qator ish koʻrsatgichlari past xodimlarni intizomiy jazolash, 5 nafar yuqori natijaga erishgan xodimlarni ragʻbatlantirish toʻgʻrisida qarorlar qabul qilindi hamda shaxsiy tarkib oʻrtasida xizmat va ijro intizomini mustahkamlash, qonunbuzarliklarni oldini olishga doir profilaktik ogohlantiruv va tushuntirish ishlari ham olib borilib, ichki ishlar organlari xodimlari tomonidan yoʻl qoʻyilgan intizom buzish holatlari aniq misollarda ular eʼtiboriga yetkazildi.

Oʻrganish va yakuniy yigʻilish davomida aniqlangan har bir masala hamda muammolarni bartaraf etish yuzasidan masʼul rahbarlarga manzilli topshiriqlar berilib ijrosi alohida nazoratga olindi.

Bu kabi oʻrganishlar viloyatning boshqa shahar va tumanlarida ham izchillik bilan davom etmoqda.

Buxoro viloyati IIB Axborot xizmati