O‘zbеkiston Rеspublikаsi Ichki ishlаr vаzirligi

Ona Vatan osoyishtaligi yoʻlida astoydil xizmat qilish, bu avvalo, masʼuliyatni his etish, shuningdek, turli tahdid va xavflar hamda kutilmagan holatlarga tayyor turish demakdir.

Ana shunday ezgu maqsadda zalvorli vazifalarni zimmasiga olgan III darajali serjant Neʼmat Qahhorov ham ahdiga fidoyilik bilan burchini ado etib kelmoqda.

Asli Samarqand viloyatining Bulungʻur tumanida tugʻilib voyaga yetgan lavhamiz qahramoni yoshligidan tirishqoq, uddaburon va aytganini qiladigan edi.

Ulgʻaygani sayin ushbu xislatlari yanada kuchayib bordi. Neʼmat futbolning ashaddiy muxlisi boʻlish bilan birga, maydonda ham ajoyib oʻyin koʻrsatish qobiliyatiga ega.

U maktabni tamomlagach, sport va pedagogika kollejida taʼlim oldi. Jismonan baquvvat hamda epchilligi bilan tengdoshlari orasida koʻzga tashlana boshladi.

Oʻqishni bitirgach, bulungʻurlik bolalarga futboldan murabbiylik qildi.

Oradan biroz vaqt oʻtib esa, jonajon Vatani oldidagi yigitlik burchini bajarish uchun armiyaga otlandi. Harbiy xizmat uning hayotida oʻchmas iz qoldirdi.

Shu boisdan hayotini Vatan himoyasiga bagʻishlashga ahd qildi. Ilk xizmat faoliyatini IIV Qorovul qoʻshinlariga qarashli Navoiy viloyatida joylashgan 7532-harbiy qismda shartnoma asosida boshladi. Ustozlaridan harbiylik sir-asrorlarini puxta oʻrganib, malakasini oshirdi.

Ayni paytda Neʼmat Qahhorov ushbu harbiy qism taʼminot batalyoni seksiya komandiri lavozimida xizmat qilmoqda. U qoʻl ostidagi askarlarning bilim va malakasini, jangovar shayligini oshirish hamda harbiy intizomni mustahkamlash yoʻlida tinmay izlanadi.

Bundan tashqari, qurol-aslahalarni texnik taʼmirlash va oʻq otish mashgʻulotlarini ham tashkil etib kelmoqda.

Harbiylik nafaqat kasb, balki yurtga sodiqlik va masʼuliyat ifodasi hamdir, — deydi u. — Ushbu sharafli soha kishida chinakam matonat va Vatan taqdiriga daxldorlik hissini kuchaytiradi.

Mana, qariyb oʻn yildirki, oʻz vazifasini sadoqat bilan bajarib kelayotgan Neʼmat Qahhorov koʻplab shogirdlar yetishtirib, ularning harbiy bilim va tajribasi hamda texnika va qurol-aslahalar bilan ishlash salohiyatini yanada takomillashtiryapti.

U oʻtgan yili qoʻshinlar miqyosida oʻtkazilgan “Ustoz-shogird” koʻrik-tanlovida ham shogirdi oddiy askar Shahzod Shokirov bilan faol ishtirok etib, jismoniy tayyorgarlik, oʻq otish va harbiy hujjatlarni yuritish shartlarida mutlaq gʻoliblikni qoʻlga kiritdi.

©️ “Postda” gazetasi, Mahliyo Xolova, Navoiy viloyati.