Faxriylar – faxrimiz. Xalq tanlagan rais
2025-05-06 14:15:00 / Yangiliklar
Isteʼfodagi podpolkovnik Azamjon Muratov Fargʻona shahridagi Furqat nomli mahalla fuqarolar yigʻiniga rais etib saylanganiga uch yil boʻldi. U vazifasiga kirishgan kundan boshlab, xalq bildirgan ishonchga munosib boʻlishni oʻziga oliy maqsad deb belgilagan edi. Oʻtgan davr mobaynida ana shu maqsadiga erishib, mahallasini eng obod va xavfsiz hududga aylantirdi.
Azamjon Muratov 1983-2001-yillarda Fargʻona viloyat ichki ishlar boshqarmasida turli masʼul lavozimlarda xizmat qilgan. Sohada orttirgan boy amaliy tajribasi bugun rais sifatida fuqarolar bilan ishlashda unga juda asqatmoqda.
- Azamjon aka nafaqat ushbu mahalla, balki unga qoʻshni mahallalarda xizmat olib boradigan profilaktika inspektorlariga ham ustoz sanaladi, — deydi mayor Dilshodjon Oltinboyev. — Chunki u fuqarolar bilan qanday muloqot qilish kerakligini juda yaxshi biladi. Qabuliga kelganlar bilan oʻz jigari, aka-ukasidek erinmay gaplashadi. Har qanday muammoga yechim topishga harakat qiladi. Jinoyatchilik va huquqbuzarliklarning barvaqt oldini olish, oilaviy nizolarga barham berish borasida tez-tez maslahatlar soʻrab turamiz. Bizga maslahat berish bilan birga, oilalarga kirib, muammolarni hal etishda amaliy yordam beradi.
Fargʻona shahrining markazida joylashgan Furqat nomli mahalla fuqarolar yigʻinidagi 510 ta xonadonda 2772 nafar aholi istiqomat qiladi. Ayni paytda mahallaning asosiy koʻchalari, gavjum joylari toʻliq kuzatuv kameralari bilan nazoratga olingan va u profilaktika inspektorining xizmat xonasiga integratsiya qilingan.
Raisning jonsarakligi, mahalla yettiligi aʼzolarning faolligi sababli fuqarolar oʻrtasida ahillik va totuvlik mustahkamlanib, jinoyat va huquqbuzarliklar salmogʻi ham kamayishiga erishilyapti.
Fuqarolar yigʻini qoshida 4 ta jamoatchilik komissiyasi tuzilgan boʻlib, ular tarkibiga mahallada obroʻ-eʼtiborga ega, fuqarolarni oʻz ortidan ergashtira oladigan eng namunali oqsoqollar, kayvoni onaxonlar kiritilgan. Masalan, “Oilaviy qadriyatlarni mustahkamlash” komissiyasi aʼzolari oʻtgan 2024-yilda 4 ta, joriy yilning oʻtgan davrida 1 ta ajralish yoqasidagi oilani yarashtirishga muvaffaq boʻlishdi.
Fidoyi raisning ish faoliyatini oʻrganish va suhbatlashish maqsadida borganimizda, mahalla fuqarolar yigʻini binosida odam gavjum edi. Azamjon Muratov xonasida bir guruh oqsoqollar bilan maslahat oʻtkazyapti, mahalla yettiligining har bir aʼzosi esa oʻz yumushlari bilan andarmon. Bino hovlisidagi orastalik, fayz, xodimlarning fuqarolarga qilayotgan samimiy munosabati, tezkorligi kayfiyatimizni koʻtarib yubordi.
“Mahalla vatan ichra kichik vatan, qadriyatlar qoʻrgʻoni”, degan taʼrifning amaldagi ifodasini koʻray, desangiz, shu mahallaga kelavering.
Abduvosit Sidiqov, oʻz muxbirimiz. “Postda”
Fargʻona viloyati