Xorazm viloyatida “Xavfsiz va sogʻlom yurt” tezkor-profilaktik oyligi doirasidagi tadbirlar izchillik bilan davom etmoqda
2025-05-06 13:05:00 / Yangiliklar
Bu boradagi chora-tadbirlar “mahallabay” tartibida tashkil etilib, rahbariyat tomonidan nazorat tartibida oʻrganilib, zarur tavsiya va topshiriqlar berib kelinmoqda.
Xususan, Xorazm viloyat IIB boshligʻi tomonidan Xonqa tumanining “Mustaqillik” mahallasida “Xavfsiz va sogʻlom yurt” tezkor-profilaktik tadbiri doirasida amalga oshirilayotgan chora-tadbirlar manzilli tarzda oʻrganildi.
Mahalla yettiligi bilan boʻlib oʻtgan suhbat jarayonida mahalladagi kriminogen vaziyat, aholining ijtimoiy ahvoli, mahallada yangi ish oʻrinlarini yaratish, xotin-qizlar va yoshlarni yangi kasblarga oʻqitish borasida amalga oshirilgan ishlar tahlil etildi.
Bundan tashqari Oʻzbekiston Respublikasi Prezidentining joriy yil 3-yanvar kunidagi «2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida»gi qarori ijrosini taʼminlash borasida mahalla yettiligi hamda tuman va viloyat miqyosidagi rahbar xodimlar tomonidan oʻzaro hamkorlikda amalga oshirilayotgan amaliy ishlar muhokama etildi.
Shuni taʼkidlash lozimki “Mustaqillik” mahallasi 2024-yilda kriminogen vaziyati ogʻir mahalla deb topilgan, shundan kelib chiqqan holda joriy yilda masʼul rahbarlar tomonidan mahalla uchun alohida chora-tadbirlar dasturi ishlab chiqilib, profilaktik ishlar tizimli ravishda amalga oshirilishi natijasida joriy yilning oʻtgan davrida mazkur mahallada jinoyat sodir etilishiga yoʻl qoʻyilmadi.
Mahalladagi oʻrganishlar yakunida viloyat IIB boshligʻi tomonidan masʼul xodimlarga chora-tadbirlarning sifat va samaradorligini oshirishga qaratilgan tegishli koʻrsatma va topshiriqlar berildi.
Xorazm viloyati IIB Axborot xizmati