Yoshlar oʻrtasida vatanparvarlik, qonunlarga hurmat va sogʻlom turmush tarzini shakllantirish maqsadida Ichki ishlar vazirligiga biriktirilgan maktab oʻquvchilari ishtirokida qator tarbiyaviy va sport tadbirlari tashkil etildi
2025-05-05 16:00:00 / Yangiliklar
Tadbir doirasida mamlakatimizning barcha hududlaridan tashrif buyurgan 112 nafar oʻquvchi Ichki ishlar vazirligi Akademiyasidagi “Ochiq eshiklar kuni”da ishtirok etishdi.
Ular Akademiya kursantlarining hayoti, oʻquv jarayoni, jismoniy va jangovar tayyorgarlik jarayonlari, mavjud infratuzilmalar hamda maʼnaviy-maʼrifiy ishlar bilan yaqindan tanishdilar.
Shuningdek, oʻquvchilar Axborot-resurs markazi, Choʻlpon muzeyi, “Vatanparvarlik burchagi”, Korrupsiyaga qarshi kurash burchagi kabi muhim obyektlar faoliyati bilan ham tanishib chiqishdi.
Tashrifning ikkinchi kunida ishtirokchilar Ichki ishlar organlari tarixi muzeyiga borishdi.
U yerda ularga ichki ishlar organlarining yurtimiz osoyishtaligini taʼminlashdagi oʻrni, jinoyatchilikka qarshi kurashishdagi saʼy-harakatlari va ushbu yoʻnalishda xizmat koʻrsatgan fidoiy xodimlar haqida batafsil maʼlumot berildi.
Tadbir doirasida sportning voleybol turi boʻyicha musobaqa ham tashkil etildi. Qizgʻin va murosasiz kechgan final oʻyinida Qoraqalpogʻiston Respublikasi jamoasi Qashqadaryo viloyati jamoasini magʻlub etib, gʻoliblikni qoʻlga kiritdi. Uchinchi oʻringa esa Navoiy viloyati jamoasi sazovor boʻldi.
Gʻoliblarga diplom, medal, kubok va qimmatbaho sovgʻalar topshirildi. Shuningdek, bir qator nominatsiyalar boʻyicha ham faol oʻquvchilar alohida taqdirlandi.
Bunday tashabbuslar yosh avlodning huquq-tartibot organlariga boʻlgan qiziqishini oshirish, ularda yurtga muhabbat va masʼuliyat tuygʻusini tarbiyalashda muhim ahamiyat kasb etadi.