Rahbarlik lavozimiga tavsiya etilgan xodimlar uchun kasbiy bilim va koʻnikmalarni mustahkamlashga qaratilgan oʻquv mashgʻulotlari oʻtkazildi
2025-05-05 12:00:00 / Yangiliklar
Oʻzbekiston Respublikasi Ichki ishlar vazirligining hududiy ichki ishlar organlaridan rahbarlik lavozimlariga nomzod sifatida tavsiya etilgan xodimlar bilan vazir oʻrinbosarining tasdiqlangan “Tuman (shahar, tarmoq) ichki ishlar organi boshligʻi (oʻrinbosari) lavozimiga nomzod sifatida tavsiya etilgan xodimlarni kasbiy bilim va koʻnikmalarini yanada mustahkamlash boʻyicha” oʻquv dasturiga muvofiq, joriy yilning 5-may kuni vazirlik Jismoniy va jangovar tayyorgarlikni tashkil etish boshqarmasi tomonidan nazariy va amaliy oʻquv mashgʻulotlari tashkil etildi.
Unda, Ichki ishlar vazirining “Ichki ishlar organlari xodimlarining xizmat, jangovar, jismoniy va axloqiy-psixologik tayyorgarligini tashkil etish, malaka toifasi hamda reyting baholash tizimini yanada takomillashtirish toʻgʻrisida” 2024-yil 5-oktyabr kunidagi 555-son buyrugʻining mazmun-mohiyati toʻliq yetkazildi.
Shuningdek, Ichki ishlar vazirligi markaziy binosida joylashgan zamonaviy elektron oʻq otish tiri, panoramali elektron tir va ViAr (VR) koʻzoynakli tirlardan amaliy oʻquv mashgʻulotlari ham tashkil etildi.
Ushbu mashgʻulotlar kelgusida xodimlarning ushbu zamonaviy tirlar va moslamalardan foydalanishi va qoʻllash boʻyicha yetarli malakalarga ega boʻlishi, kelgusida jinoyatchilarni qoʻlga olish, fuqarolar xavfsizligini taʼminlash va professional ichki ishlar organlari xodimlarini shakllantirishda zamin yaratadi.
Mashgʻulotlar davomida xodimlar egallagan nazariy bilimlarini yanada mustahkamlashi va jangovar tayyorgarlik boʻyicha shaxsiy qobiliyatlarini rivojlantirib, oʻzlarining kasbiy mahoratlarini yanada oshirishga zamin yaratishi shubhasizdir.