O‘zbеkiston Rеspublikаsi Ichki ishlаr vаzirligi

Elu yurt tinchligi va osoyishtaligini asrash dolzarb masala. Tinch yurtda-gina insonlar xotirjam hayot kechiradi, ertangi kunga umid hamda ishonch koʻzi bilan boqadi.

Oʻzbekiston Respublikasi Prezidentining qarori asosida kriminogen vaziyat ogʻir mahallalarda yangi huquq-tartibot maskanlari tashkil etilishi ham tinchlikni mustahkamlash yoʻlidagi samarali chora-tadbirlardan biri boʻldi.

Andijon viloyatining kichik tumanlaridan biri hisoblangan Buloqboshida ham ana shunday huquq-tartibot maskani ish boshladi.

Tuman markazidan oʻtuvchi katta yoʻlning shundoqqina yuzida joylashgan maskan murojaat bilan keluvchilar uchun har tomonlama qulay. Binodan tortib, jihozlargacha yangi, zamonaviy. Xizmat xonalari barcha zarur ish qurollari bilan taʼminlangan. Yuqori malakaga ega sohaviy xizmat xodimlaridan iborat tarkib kunu tun xizmatda.

Joriy yilning 1-aprel sanasidan oʻz faoliyatimizni boshladik. Maskanimiz Mirzakalon Ismoiliy nomli mahalla fuqarolar yigʻini oʻramida barpo etildi.

Ushbu mahalla 4-yildan buyon “qizil” toifada, — deydi bosh inspektor, podpolkovnik Mansurjon Xolmanov. — Hududda bozor va boshqa jamoat maskanlari mavjudligi uchun turli huquqbuzarliklar sodir boʻlib turadi.

Shu bois kriminogen vaziyat ogʻir mahalla toifasiga kirib qolgan. Bundan tashqari, “Uch koʻcha”, “Farovon”, “Qumguzar” kabi “yashil” toifadagi yana uchta MFYga xizmat koʻrsatamiz. Ayni paytda huquq-tartibot maskanimiz tomonidan nazoratga olingan hudud aholisi 12 800 nafarni tashkil etadi.

Podpolkovnik Mansurjon Xolmanovning aytishicha, yangi tuzilmada osoyishtalikni saqlash va huquqbuzarliklarning barvaqt oldini olish uchun barcha zarur vositalar mavjud. Masalan, bosh inspektorga “Damas” rusumli xizmat avtomashinasi ajratildi.

Hududga 21 ta kameralar oʻrnatilib, uskunalar bitta kompyuterga integratsiya qilindi. Bu jarayon vaziyatni doimiy kuzatib borish va yuz berish ehtimoli boʻlgan huquqbuzarlikni avj olmasidan avval toʻxtatib qolish imkonini yaratadi.

Yana bir qulaylik — mikrofonli radioapparat hisoblanib, unga ulangan koʻchalar va jamoat joylaridagi radiokarnaylar yordamida aholini turli jinoyatlar afvidan doimiy ravishda ogohlantirib turish mumkin.

Shuni taʼkidlash joizki, bosh inspektor va kichik inspektor kabi yangi lavozimlarning joriy etilishi sohaga oʻzgacha yondashuvni ifodaladi.

Bundan tashqari, bir nafar Probatsiya xizmati, YPX, xotin-qizlar bilan ishlash hamda profilaktika kichik inspektorlari, ikki nafar qoʻriqlash xizmati, toʻrt nafar profilaktika inspektori, bir nafar jinoyat qidiruv xodimining jalb etilganligi ahamiyatga ega.

Qolaversa, voqea joyiga tezkorlik bilan yetib borishni taʼminlovchi aloqa vositalari, xizmat avtomashinalarining mavjudligi ham jinoyatchilikka barvaqt barham berishda muhim rol oʻynaydi.

Masalan, qatʼiy nazorat tizimi va tezkor xizmatlarning yoʻlga qoʻyilganligi natijasida shu kungacha hududda bironta huquqbuzarlik kuzatilmadi.

Chunki qoidabuzarlikka moyil shaxslar ham kuzatuvlar kuchaytirilgani, qonun ustuvorligi, qolaversa, jazo muqarrarligini tushunib yetmoqda.

©️ “Postda” gazetasi, Nigoraxon Toʻxtamatova, Andijon viloyati.