O‘zbеkiston Rеspublikаsi Ichki ishlаr vаzirligi

“Jinoyatchilikka qarshi samarali kurashish va fuqarolar uchun xavfsiz muhitni yaratish – bugungi kunning eng dolzarb vazifalaridan biridir.

Oʻzbekiston Respublikasi Prezidentining 2025-yil 3-yanvar kunidagi “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish chora-tadbirlari toʻgʻrisida“ gi Qarori bu boradagi ishlarni yanada jadallashtirdi.

Mazkur qarorda hududlarda kriminogen vaziyatni barqarorlashtirish maqsadida Ichki ishlar organlari xodimlari hamda hamkor tashkilotlar masʼullarining zimmasiga bir qator vazifalar yuklangan.

Bu borada Olot tumanida qanday ishlar amalga oshirilyapti. Yuzaga kelayotgan muammolar nimalardan iborat. Ichki ishlar boshqarmasi boshligʻi boshchiligidagi masʼullarning tumanda olib borgan oʻrganishlarida aynan ushbu masalalarga alohida eʼtibor qaratildi.

Masʼullar dastlab Maʼrifat mahallasida boʻlishdi. Bu yerda ushbu Qaror hamda Oʻzbekiston Respublikasi Vazirlar Mahkamasining “Obod va xavfsiz mahalla” tamoyili asosida mahallalarda ijtimoiy profilaktika tizimi samaradorligini oshirish chora-tadbirlari toʻgʻrisidagi 801-sonli qarori talablari asosida amalga oshirilayotgan ijtimoiy profilaktik tadbirlarning natijadorligi, yoʻl qoʻyib kelinayotgan tizimli kamchiliklar birma-bir muhokama qilindi.

Shu bilan birga “Namunali xavfsiz koʻcha” va “Namunali xavfsiz yoʻlak” larni tashkil qilish, belgilab olingan nuqtalarga intellektual videokuzatuv kameralarini oʻrnatib “Tezkor boshqaruv Markazi“ga integratsiya qilish, ijtimoiy hamda maishiy xizmat koʻrsatish shoxobchalari va xonadonlarni qoʻriqlovga olish va tashvish signallarini oʻrnatish borasida olib borilgan ishlar ham oʻrganildi.

Ushbu mahallada faoliyat olib borayotgan 1-son umumiy oʻrta taʼlim maktabida amalga oshirilgan oʻrganishlar davomida esa, oʻquvchilarning kundalik davomatini nazorat qilish, voyaga yetmaganlarni turli yod gʻoyalar taʼsiriga tushib qolishdan asrash, narkotik va psixotrop moddalar isteʼmoli va uni tarqatish bilan bogʻliq sodir etilayotgan jinoiy tajovuzlardan saqlash, huquqbuzarlik va jinoyat sodir etishlariga yoʻl qoʻymaslik, oʻtkir tigʻli jismlarni yonida olib yurishning ogʻir oqibatlari yuzasidan oʻtkazilgan tushuntirish va targʻibot ishlari, ularni vatanparvarlik ruhida tarbiyalash borasida taʼlim maskani masʼullarining olib borayotgan saʼy-harakatlari, mavjud muammolar va shart-sharoitlar birma-bir koʻrikdan oʻtkazildi.

Bundan tashqari, maktabda oʻqituvchi va oʻquvchilarning xavfsizligini taʼminlash, PQ-1-son qaror boʻyicha maskanga kirish-chiqish joylarida hamda ochiq sport maydonlarining intellektual videokuzatuv kameralari bilan jihozlanganlik holati ham koʻzdan kechirilib, aniqlangan kamchiliklarni bartaraf etish yuzasidan manzilli choralar belgilab olindi.

Oʻrganishlar yakunida Olot tumani hokimligida tezkor yigʻilish oʻtkazildi.

Bunda joriy yilning 22-29-mart kunlari Oʻzbekiston Respublikasi Ichki ishlar vazirligi ishchi guruhi tomonidan Buxoro viloyatida olib borilgan kompleks inspektorlik tekshiruvi yakunlari yuzasidan oʻtkazilgan yigʻilishda berilgan topshiriqlar ijrosi muhokama qilindi.

Tanqidiy va tahliliy tarzda oʻtgan yigʻilishda masʼul rahbar hamda xodimlarning har biri bilan yuzma-yuz muloqot qilinib, aniqlangan kamchiliklarni bartaraf etish yuzasidan sohaviy xizmatlar kesimida amalga oshirilgan ishlar boʻyicha hisobotlari tinglanib, qoʻpol va tizimli kamchiliklarga yoʻl qoʻyib kelayotgan masʼullarga nisbatan qattiq intizomiy taʼsir choralarini qoʻllash boʻyicha qarorlar qabul qilindi.

Jarayonda, joriy yilning bugungi kuniga qadar tuman hududida qayd etilgan huquqbuzarlik hamda jinoyatlarning kelib chiqish sabablari, omil boʻlgan shart sharoitlar, jinoyatlarning turlari, sodir etgan shaxslarning toifalari kesimida chuqur tahlil qilinib, galdagi vazifalar belgilab berildi.

Bu kabi oʻrganishlar viloyatning boshqa shahar va tumanlarida ham izchillik bilan davom etmoqda.

Buxoro viloyati IIB Axborot xizmati