Buxoro viloyatida afv etilgan fuqarolarning muammolari oʻrganildi
2025-05-01 16:35:00 / Yangiliklar
Oʻzbekiston Respublikasi Prezidenti Shavkat Mirziyoyev muborak Ramazon hayitini nishonlash arafasida xalqimizga xos ezgulik, bagʻrikenglik, insonparvarlik, mehr-oqibat va kechirimli boʻlish kabi olijanob fazilatlarning yorqin ifodasi sifatida “Jazo muddatini oʻtayotgan, qilmishiga chin koʻngildan pushaymon boʻlgan va tuzalish yoʻliga qatʼiy oʻtgan bir guruh shaxslarni afv etish toʻgʻrisida”gi Farmonni imzoladi.
Farmonga muvofiq, Oʻzbekiston Respublikasi Konstitutsiyasining 109-moddasi 23-bandiga asosan jazo muddatini oʻtayotgan hamda qilmishiga chin koʻngildan pushaymon boʻlgan va tuzalish yoʻliga qatʼiy oʻtgan 488 nafar shaxs afv etildi. Ular qatorida Buxoro viloyatida istiqomat qiluvchi 18 nafar shaxslar ham bor.
Bugun, Buxoro viloyati prokurori hamda Ichki ishlar boshqarmasi boshligʻi boshchiligidagi masʼullar Jamoat xavfsizligi xizmati Huquqbuzarliklar profilaktikasi boshqarmasi Ijtimoiy profilaktika boʻlimi binosida afv etilgan ushbu 18 nafar buxorolik fuqarolarning muammolarini oʻrganib, ularning murojaatlari boʻyicha manzilli chora tadbirlarni belgiladilar.
Jarayonda davlatimiz rahbari tomonidan berilgan imkoniyatni chuqur his qilgan holda, undan oqilona foydalanish, kelgusida jinoyat va huquqbuzarliklarga nisbatan murosasiz boʻlish, qayta jinoyat sodir qilmaslik borasida tushunchalar berildi.
Shuningdek, afv etilib, oilasi va yaqinlari bagʻriga qaytgan ushbu fuqarolarni ijtimoiy hayotga moslashtirish, foydali mehnat bilan shugʻullanishlari, sogʻlom turmush tarzini yoʻlga qoʻyib, jamiyatda munosib oʻrin topishlari uchun koʻmak berish borasida mahalla “yettiligi“, tegishli korxona va tashkilotlar vakillariga topshiriq va koʻrsatmalar berildi.
Buxoro viloyati IIB Axborot xizmati