Navoiy viloyatida oʻtkazilgan kompleks inspektorlik tekshiruvi natijalari boʻyicha hisobot yigʻilishi oʻtkazildi
2025-05-07 10:30:00 / Yangiliklar
Majlisda, ishchi guruhning Navoiy viloyatdagi oʻrganish yakunlariga koʻra, har bir shahar va tuman kesimida kriminogen vaziyat, huquqbuzarliklarni barvaqt oldini olish, aholi murojaatlarini oʻrganish, jamoat tartibi hamda yoʻl harakati xavfsizligini taʼminlash, shuningdek xodimlarning ijro hamda xizmat intizomiga rioya etish masalalari tanqidiy muhokama qilindi.
Jarayonda, Ichki ishlar vazirining buyrugʻi bilan xizmat faoliyatida yuqori natijalarga erishgan, namunali xizmat faoliyati uchun aholi hamda safdoshlari tomonidan alohida eʼtirof etilgan xodimlar munosib mukofotlandilar.
Jumladan, Qiziltepa tumani IIB Tezkor qidiruv xizmati tezkor vakili katta leytenant Inomjon Narzullayev muddatidan oldin “kapitan” maxsus unvoni bilan, Zarafshon shahar IIB huzuridagi Tergov guruhi katta tergovchisi kapitan Bobur Rahmatov muddatidan oldin “mayor” maxsus unvoni bilan taqdirlandilar.
Shuningdek, viloyat Ekspert-kriminalistika boʻlimining uch nafar ekspert kriminalistlari hamda Zarafshon shahar IIBning toʻrt nafar rahbar xodimlari “pul mukofoti” bilan ragʻbatlantirildilar.
Kompleks inspektorlik tekshiruvi natijalariga koʻra, xizmat faoliyatida jiddiy kamchiliklarga yoʻl qoʻygan bir guruh rahbarlarga nisbatan intizomiy taʼsir choralari qoʻllanildi.
Tadbir jarayonida kompleks inspektorlik tekshiruvi yakuniga koʻra viloyat IIB hamda hududiy boʻlinmalarning moddiy-texnik taʼminotini yaxshilash boʻyicha chora-tadbirlar belgilandi.
Yigʻilishda soha masʼullarining hisobotlari tinglandi, aniqlangan kamchiliklarni bartaraf etish yuzasidan aniq muddatlar belgilanib, yechimini kutayotgan boshqa masalalar yuzasidan istiqbolli vazifalar rejalashtirildi.