O‘zbеkiston Rеspublikаsi Ichki ishlаr vаzirligi

Andijon viloyati Ichki ishlar boshqarmasi Tezkor vazifalarni bajaruvchi safarbar otryadida oʻktam, chapdast va zukko xodimlar talaygina. Ularga tajribali rahbar, podpolkovnik Baxtiyor Moʻminov boshchilik qilib kelmoqda. Otryadning jangovar tayyorgarligidan tortib, berilgan topshiriqni bajarishgacha boʻlgan masʼuliyatli jarayon aynan mazkur mutaxassisning nazoratida amalga oshiriladi.

Otryad xodimlari jamoat joylarida osoyishtalikni saqlash, fuqarolar xavfsizligini taʼminlash, jinoyatchilikka qarshi kurashishda tezkorlik bilan chora-tadbirlarni koʻllaydi.

Uyushgan jinoyatchi guruhlar tinchlikka raxna soluvchi eng katta xavf omillaridan hisoblanadi. Ularning xavfli jihati — uyushganligi va turli qurol vositalariga ega boʻlishi mumkinligi. Bu esa ularga qarshi kurashish jarayonini murakkablashtiradi. Shu bois bunday jinoiy toʻdalarni qoʻlga olish paytida aynan maxsus tayyorgarlikka ega safarbar otryad xizmatidan foydalaniladi.

Viloyatda oʻtkazilayotgan “Xavfsiz va sogʻlom yurt” keng qamrovli tezkor-profilaktik tadbirlar davomida korrupsiya va boshqa jinoyatlarni aniqlash choralari koʻrilmoqda. Masalan, Oltinkoʻl tumanida oʻz xonadonida tavakkalchilikka asoslangan qimor oʻyinlarini tashkil etgan shaxs va oʻyin ishtirokchilari qoʻlga olindi. Andijon tumanida esa mansabdor shaxs tomonidan korrupsiyaga yoʻl qoʻyilishi bilan bogʻliq holat fosh etildi. Asakada ham oʻz xizmat vazifasini suiisteʼmol qilgan davlat xizmatchisining kirdikorlariga vaqtida chek qoʻyildi. Bu kabi jinoyatlar viloyatning boshqa tumanlarida ham aniqlanib,uning ishtirokchilari qonun hukmiga topshirildi.

Bugun Andijon koʻchalari turli avtotransport vositalari bilan gavjum. Bu esa yoʻl-patrul xizmati xodimlaridan yanada koʻproq diqqat-eʼtibor va hushyorlikni talab qiladi. Shu maqsadda yoʻl-patrul xizmati xodimlari bilan hamkorlikka safarbar otryad xodimlari ham jalb etilgan. Maqsad — ichki ishlar xodimlarining talablariga boʻysunmagan shaxslar ustidan qatʼiy nazoratni yoʻlga qoʻyish.

Tezkor vazifalarni bajaruvchi safarbar guruh xodimlari nafaqat jangovar, balki axloqiy, psixologik, maʼnaviy, maʼrifiy tayyorgarlikdan oʻtib, oʻz bilimlarini takomillashtirib boradi. Chunki yuqori aqliy salohiyat hamda kuchli psixologiya ularning tezkor va toʻgʻri qaror qabul qilishida muhim rol oʻynaydi.

Otryadda koʻp yillik tajribaga ega salohiyatli xodimlar koʻpchilikni tashkil etadi. Respublikada oʻtkaziladigan turli sport musobaqalarida ham viloyat ichki ishlar boshqarmasi sharafini asosan safarbar boʻlinma vakillari himoya qiladi. Ularning sport va boshqa bellashuvlarda qoʻlga kiritgan yutuqlari hamda fidokorona xizmatlari davlatimiz tomonidan munosib baholangan. Jumladan, kapitan Muhammadjon Koʻchqorov “Mardlik” ordeni, serjant Akramjon Abdulazizov “Aʼlo xizmatlari uchun” koʻkrak nishoni, serjant Tavakkal Sotqinov “Sodiq xizmatlari uchun” medali, katta serjant Joʻrabek Boymirzayev hamda kichik serjant Durdona Kodirova “Jasorat” medallari bilan taqdirlangan.

Nigora TOʻXTAMATOVA, oʻz muxbirimiz.
Andijon viloyati.