O‘zbеkiston Rеspublikаsi Ichki ishlаr vаzirligi

Insonni maʼnaviy-axloqiy jihatdan bezaydigan fazilatlardan biri halol-pokiza yashash, birovning haqiga xiyonat qilmaslikdir. Halollik vijdon, adolat va burch kabi axloqiy tushunchalar bilan bogʻliq. Buni yaxshi anglagan isteʼfodagi mayor Abdugʻaffor Begimqulov oʻz umrini vatanga xizmat qilish, yurt osoyishtaligi uchun fidoyilik koʻrsatish yoʻlida sarf etdi.

1982-2007-yillarda dastlab Transportda xavfsizlikni taʼminlash yoʻnalishida, soʻngra Termiz shahrida profilaktika inspektori, viloyat IIB Migratsiya va fuqarolikni rasmiylashtirish boshqarmasida katta inspektor, Angor tumani IIB Migratsiya va fuqarolikni rasmiylashtirish boʻlimi boshligʻi lavozimlarida faoliyat yuritdi.

U paytlarda sharoit bugungidek emas, transport, uy-joy bilan taʼminlanish darajasi ogʻirroq edi, — deb eslaydi lavhamiz qahramoni. — Shunga yarasha xizmat faoliyati ham biroz qiyinroq kechardi. Ammo, shukrki, yaxshi sharoitlarni ham koʻrib, qoʻldan kelgancha xizmat vazifamizni sidqidildan ado etishga harakat qildik.

Hamisha otam bergan oʻgitlarga amal qildim. Toʻgʻri yoʻldan yurdim, faqat bilimim va qonunga suyanib ish tutdim. Shukr, kam boʻlmadim, bugun ham ichki ishlar organi faxriysi sifatida hurmatdaman.

Bundan juda mamnunman. A.Begimqulov 2007-yilda Muzrabot tumani IIB HPB katta inspektorligidan pensiyaga chiqqach, “Sharq guli” mahallasiga raislik qildi, soʻngra tuman Tibbiyot birlashmasida xodimlar noziri boʻldi.

Hozirda Angor tumani IIB Faxriylar kengashi raisi sifatida 330 nafar faxriyning boshini biriktirib, tadbirlarda faol ishtirok etib kelmoqda.

Xususan, 4 nafar faxriyga nogironlik aravachasi olib berishda, boquvchisini yoʻqotgan oilalarga moddiy yordam koʻrsatishda ham tashabbus koʻrsatdi.

Darvoqe, oʻtgan yili faxriy xodimlar oʻrtasida oʻtkazilgan shaxmat musobaqasida Abdugʻaffor Begimkulov viloyatda birinchi oʻrinni egalladi.

Ilgari sportning qoʻl jangi hamda kurash turi bilan shugʻullanganman, — deydi A.Begimkulov. — Kurash boʻyicha sport ustasi darajasiga erishganman.

Shaxmatni ham yaxshi koʻraman. Hozir nabiralarim bilan tez-tez dona suramiz. Ularni sportga oshno qilishga, erishgan yutuqlarini ragʻbatlantirib borishga harakat qilaman.

Faxriy qahramonimiz turmush oʻrtogʻi Nazira aya bilan 2 oʻgʻil, 2 qizni oʻqitgan, hozirda nabiralarining tarbiyasi bilan mashgʻul.

Isteʼfodagi mayor bugun Angor tumani IIBdagi yosh xodimlarga ustozlik qilib, ularga toʻgʻri yoʻl koʻrsatishga, egnidagi libosiga dogʻ tushirmaslikka undaydi.

Oʻzi kitobsevar boʻlgani bois ularni ham shunga daʼvat qiladi. Zero, u bosib oʻtgan yoʻl, hayotiy tajribalar keyingi avlod vakillari uchun ibrat boʻla oladi.

©️ “Postda” gazetasi, Feruza Rahmonqulova.