Toshkent shahar IIBB rahbariyatining Yashnobod va Bektemir tumanlari aholisi uchun tashkillashtirilgan navbatdagi sayyor qabuli boʻlib oʻtdi
2025-04-27 09:00:00 / Yangiliklar
Davlatimiz rahbari tashabbusi bilan joriy etilgan sayyor qabullar tizimi aholining muammolarini joyida oʻrganish va hal etish, ertangi kunga ishonch hissini kuchaytirish, ijtimoiy-iqtisodiy muhitni yanada yaxshilashga xizmat qilmoqda.
Yashnobod va Bektemir tumanlari aholisi uchun tashkillashtirilgan navbatdagi sayyor qabul Yashnobod tumanida joylashgan “Band boʻlmagan aholiga xizmat koʻrsatish Monomarkaz“ binosida boʻlib oʻtdi.
Poytaxt IIBB boshligʻi polkovnik Ravshan Sultanxodjayev va Xalq qabulxonasi tomonidan oʻtkazilgan qabulda ushbu tumanlarning mutasaddi tashkilotlar rahbarlari ham ishtirok etishdi.
Oʻtkaziladigan sayyor qabul davomida jami 34 nafar fuqarolarning muammolari oʻrganildi.
Ulardan 15 tasi surishtiruv va tergov harakatlari yuzasidan; 5 tasi yetkazilgan moddiy zararni undirish boʻyicha; 2 tasi ichki ishlar organlariga xizmatga qabul qilish, xizmatni oʻtash va qayta tiklash yuzasidan; 8 tasi probatsiya hisobda turgan shaxslarni muddatidan ilgari shartli ozod qilish masalasida; 3 tasi Oʻzbekiston Respublikasi fuqaroligini olish boʻyicha; 1 tasi davolanish uchun moddiy yordam boʻyicha murojaatlari qabul qilindi.
Murojaatlarning 9 tasi joyida ijobiy hal etildi, 5 tasi boʻyicha malakali tushuntirish berildi, koʻrib chiqish qoʻshimcha muddat talab etadigan 20 ta murojaatlarning ijrosi nazoratga olindi.
Shuningdek, sayyor qabul davomida 3 nafar fuqaroga Oʻzbekiston Respublikasining fuqarolik pasportini olishda amaliy yordam koʻrsatildi.
Bu kabi sayyor qabullar aholi va davlat organlari oʻrtasida ochiq muloqotni taʼminlash, muammolarni kechiktirmasdan hal etishda muhim qadam hisoblanadi.
Ushbu tadbirlar fuqarolarning davlat idoralariga boʻlgan ishonchini oshirish, jamiyatda samarali ijtimoiy sheriklikni rivojlantirishga xizmat qiladi.
Toshkent shahar IIBB Axborot xizmati