Yoʻl intizomni yoqtiradi. Qoidabuzar haydovchilarga chora koʻrildi
2025-04-26 07:50:00 / Yangiliklar
Xorazm viloyatida «Ogʻir oqibatli yoʻl-transport hodisalarining oldini olish oyligi» oʻtkazilmoqda. 30-aprelga qadar davom etadigan oylik doirasida viloyat IIB JXX YHXB va huquqni muhofaza qiluvchi boshqa organlar hamkorligida harakat xavfsizligini taʼminlashga qaratilgan keng qamrovli profilaktik-targʻibot hamda reyd tadbirlari amalga oshirilmoqda.
Shu kunga qadar oylik doirasida oʻtkazilgan reydlarda yoʻl-patrul xizmati inspektorlari tomonidan 10021 ta qoidabuzarlik aniqlandi. Bunda, jumladan, 336 nafar haydovchi svetofor ishoralariga rioya etmagan, 2014 nafari tegishli hujjatlarga ega boʻlmagan, 4398 nafari esa qoʻpol qoidabuzarliklar sodir qilgan. Eng achinarlisi, 62 nafar fuqaro mast holatda transport vositasini boshqargan.
- Asosan haydovchilarning transport vositalarini spirtli ichimlik isteʼmol qilgan holda boshqarayotgani, tezlikni meʼyor talablaridan oshirishi, svetofor ishoralariga rioya etmasligi avtohalokatlarning kelib chiqishiga sabab boʻlmoqda, — deydi viloyat IIB JXX YHXB Axborot guruhi katta mutaxassisi, kapitan Shavkat Bobojonov. — Bunday noxush holatlarning oldini olish maqsadida mahallalarda, korxona va tashkilotlarda, oʻquv muassasalarida targʻibot tadbirlarini oʻtkazyapmiz. Bunda haydovchi va piyodalarning masʼuliyatini oshirish, ularning yoʻllarda harakatlanish madaniyatini yuksaltirishga alohida eʼtibor qaratilmoqda.
Avtomobil yoʻllarining belgilangan talab va meʼyorlarga mos kelishi ham yoʻl-transport hodisalarining oldini olishda muhim sanaladi. Shu bois oylik davomida viloyat hududidagi avtoyoʻllarni koʻrikdan oʻtkazish, aniqlangan kamchiliklarni qisqa fursatlarda bartaraf etish yuzasidan zarur choralar koʻrilyapti.
Oylik doirasidagi tadbirlar viloyatning eng chekka hududlarida ham davom etmoqda.
Xudoybergan JABBOROV, oʻz muxbirimiz.
Xorazm viloyati.