Namangan viloyati IIB JXX HPB xodimlarining 2023-yil 12 oyi davomida amalga oshirgan ishlari sarhisob qilindi
2024-01-14 11:35:00 / Yangiliklar
Joriy yilning 11-yanvar kuni Namangan viloyati IIB Katta majlislar zalida boshqarma Huquqbuzarliklar profilaktikasi boshqarmasi apparati, tuman-shahar IIB boshliqlarining xizmat boʻyicha oʻrinbosarlari, JXX, HPB boshliqlari, profilaktika (katta) inspektorlari, HQMB katta inspektorlari hamda voyaga yetmaganlar boʻyicha inspektor-psixologlar ishtirokida oʻtgan 2023-yilning 12 oyi mobaynida amalga oshirilgan ishlar tahlili va yoʻl qoʻyilgan kamchiliklar muhokamasiga bagʻishlangan yigʻilish boʻlib oʻtdi.
Oʻzbekiston Respublikasi IIV Huquqbuzarliklar profilaktikasi xizmati boshligʻi hamda Namangan viloyati IIB boshligʻining oʻrinbosari ishtirokida oʻtkazilgan yigʻilishda oʻtgan yil davomida amalga oshirilgan ishlar va yoʻl qoʻyilgan kamchiliklar yoʻnalishlar kesimida muhokama qilindi.
Kun tartibidagi masala yuzasidan Namangan viloyati IIB Huquqbuzarliklar profilaktikasi boshqarmasi boshligʻining axboroti tinglandi. Axborotdan kelib chiqib, eʼtibor qaratish zarur boʻlgan vazifalar belgilab olindi.
Xususan, oʻtgan yil davomida Huquqbuzarliklar profilaktikasi boshqarmasi xodimlarining Oʻzbekiston Respublikasi Konstitutsiyasi, qonunlari va boshqa normativ-huquqiy hujjatlarga soʻzsiz amal qilinishi, shuningdek, kasbiy madaniyat va xizmat intizomi Kodeksi talablariga rioya etishlarini taʼminlash borasida olib borilgan amaliy ishlar qayd etildi.
Axborotdan soʻng Oʻzbekiston Respublikasi Huquqbuzarliklar profilaktikasi xizmati boshligʻi, polkovnik Baxtiyor Berdialiyev soʻz olib, soʻnggi 7-yil ichida Oʻzbekiston Respublikasi Prezidenti tomonidan aholining tinchligini saqlash va xavfsizligini taʼminlash masalasiga katta eʼtibor qaratib kelinayotganligi, mahallada xavfsiz muhitni yaratish borasida ichki ishlar organlarining profilaktika inspektorlariga yuksak ishonch bildirilib, ularning benuqson xizmat tashkil etishi uchun barcha sharoitlar yaratib berilayotganligini alohida taʼkidladi.
Yigʻilish yakunida xizmat faoliyati davomida ijobiy natijalarga erishgan va samarali mehnat qilgan xodimlarga vazirlik rahbariyatining tashakkurnomalari hamda pul mukofotlari tantanali ravishda topshirildi.
Namangan viloyati IIB Axborot xizmati