Jarqoʻrgʻon tumanida jinoyatchilik va huquqbuzarliklarga qarshi kurashish borasidagi ishlar sarhisob qilindi
2024-01-13 09:00:00 / Yangiliklar
Jamiyatimizda barqarorlikni saqlash, fuqarolarimiz tinchligi va osoyishtaligini taʼminlash, qonunchilik va huquq-tartibotni mustahkamlashda ichki ishlar organlarining samarali faoliyati muhim oʻrin egallaydi.
Taʼkidlash joizki, Davlatimiz rahbarining tashabbusi bilan keyingi yillarda sohani xalqparvar tizimga aylantirishga qaratilgan koʻplab normativ-huquqiy hujjatlar qabul qilindi.
Buning natijasida ichki ishlar organlarining jinoyatchilikka qarshi kurash, uning oldini olish, jamoat tartibini saqlash va fuqarolar xavfsizligini taʼminlash, aholining huquqiy ongi va madaniyatini oshirish borasidagi roli tobora oshib bormoqda. Eng muhimi, ichki ishlar organlari xodimlarining xalq ichiga kirib borishlari sezilarli darajada oʻsib borishi kuzatilmoqda.
Surxondaryo viloyati IIB boshligʻi polkovnik А.С.Исмоилов huzurida 2023-yilning 12 oyi davomida Jarqoʻrgʻon tumanida jinoyatchilik va huquqbuzarliklarga qarshi kurashish, uning oldini olish borasida amalga oshirilgan ishlar muhokamasiga bagʻishlangan yigʻilishda ham ayni jihatlar eʼtirof etildi.
Shu bilan birga oʻtgan yil davomida bu borada yoʻl qoʻyilgan xato va kamchiliklar chuqur tahlil qilindi. Viloyat va Jarqurgʻon tumani masʼullari ishtirok etgan muhokamada har bir hududni, mahallani jinoyatdan holi manzilga aylantirish borasida hamkorlikda amalga oshirish lozim boʻlgan takliflar oʻrtaga tashladi.
Negaki, har qanday huquqbuzarlik holatlarining oldini olish borasidagi harakatlar avvalo, mahallalarda keng jamoatchilik ishtirokida tashkil etilishi alohida ahamiyat kasb etadi.
Shu bois har bir profilaktika inspektori “Mening mahallamda jinoyat sodir boʻlmasligi kerak” shiori ostida harakatlanishi va bu borada kerak boʻlsa, qoʻshimcha kuch va vositalarning koʻmagida amaliy ishlarga qoʻl urishi lozimligi taʼkidlandi.
Tanqidiy-tahliliy ruhda oʻtgan yigʻilishda, oʻtgan bir yil davomida yoʻl qoʻyilgan xato va kamchiliklarni bartaraf etish, jinoyatchilikni oldini olishda mahallabay, fuqarobay ish tizimidan foydalanish va boshqa vazifalar boʻyicha zarur chora-tadbirlar belgilab olindi.
Surxondaryo viloyati IIB Axborot xizmati