Faxriylar va yoshlar uchrashuvi
2024-01-13 09:00:00 / Yangiliklar
Qurolli Kuchlarimiz tashkil topganining 32-yilligi va 14-yanvar – Vatan himoyachilari kuni munosabati bilan Qurolli kuchlar va IIV tizimlaridan isteʼfoga chiqqan faxriylarining Ichki ishlar vazirligi Malaka oshirish institutida boshlangʻich tayyorgarlik oʻquv kurslari tinglovchilari bilan davra suhbati boʻlib oʻtdi.
Unda Oʻzbekiston Qurolli mojarolar va antiterroristik kurash nogiron-faxriylarining “Vatan” xayriya jamoat fondi raisi Abdumannopov Abduraxim Madraximovich, jamoat fondi aʼzolari, nafaqadagi polkovnik Sheyko Aleksey Alekseyevich, polkovnik Djumagulov Tursun Turgʻunovich, polkovnik Abdullayev Rashid Igamberdiyevich va professor-oʻqituvchilar, tinglovchilar ishtirok etdi.
Tadbirda soʻzga chiqqanlar, keksa avlod vakillariga hurmat va ehtirom koʻrsatish milliy qadriyatlarimizdan ekanini taʼkidlab, ularning uzoq yillik samarali xizmatlari davomida orttirgan tajribalari, jasorati va fidoyiligi oʻsib kelayotgan yosh avlod tarbiyasida alohida oʻrin tutishini, ibratli hayot yoʻllari esa yoshlarda gʻayrat-shijoatni, elu yurtidan gʻururlanish tuygʻusini kuchaytirishga xizmat qilishini taʼkidladi.
Uchrashuvda mustaqillik, tinchlik xalqimizning bebaho boyligi ekani, mamlakatimizda barcha sohalarda olib borilayotgan izchil islohotlar zamirida ana shu neʼmatlarni koʻz qorachigʻiday asrab-avaylash masʼuliyati mujassamligi, yoshlarimizni Vatanga sadoqat va milliy qadriyatlarimizga hurmat ruhida tarbiyalashning ahamiyati xususida soʻz yuritildi.
Faxriylar tinglovchilarga oʻzlarining xizmat yoʻli, qatnashgan jangovar harakatlari va bu harakatlarda ularga nimalar yordam berganligi toʻgʻrisida gapirib berdi. Bugun tahsil olayotgan yoshlar institut professor-oʻqituvchilari tomonidan berilayotgan bilimlarni oʻzlashtirishlari, amaliy mashgʻulotlar, shu jumladan, jangovar va jismoniy tayyorgarlikka alohida eʼtibor berish, oʻz ustilarida tinimsiz ishlashlari, “ustoz-shogird” anʼanasiga amal qilish, ularning orttirgan tajribalaridan unumli foydalanish zarurligini taʼkidlab oʻtdilar.
Faxriylar tinglovchilarning qiziqtirgan savollariga atroflicha javoblar qaytardi.
IIV Malaka oshirish instituti