Qonunga itoatkorlik zarur
2025-04-24 23:00:00 / Yangiliklar
Hazorasp tumani IIB JXX Probatsiya guruhi xodimlari mahkumlarning huquq va qonuniy manfaatlarini himoya qilish, ular oʻrtasida oʻtkaziladigan tarbiyaviy-profilaktik ishlar samaradorligini oshirishga alohida eʼtibor berishmoqda. Ayniqsa, mahkumlarning belgilangan qonun-qoidalarga toʻliq rioya etishi doimiy ravishda oʻrganib borilyapti.
Joriy yilning oʻtgan davrida 323 nafar mahkum probatsiya nazorati ostida boʻlib, ularning barchasi sud hukmida belgilangan jazolarni oʻtab kelmoqda, — deydi Probatsiya guruhi katta inspektori, mayor Azamat Quryozov. -Mahkumlar bilan muntazam tarzda tarbiyaviy-profilaktik tadbirlar olib borilayotgani bois, ularning 144 nafari tuzalish yoʻliga oʻtgani uchun muddatidan ilgari shartli ravishda jazodan ozod etildi.
Jazo muqarrarligini taʼminlash, mahkumlar ongida qonunga itoatkorlik hissini uygʻotish maqsadida sayyor sud yigʻilishlari oʻtkazib kelinmoqda. Sud jarayonlarida jazoni oʻtash davrida belgilangan tartib-qoidalarga rioya qilgan, tuzalish yoʻliga oʻtgan shaxslarni muddatidan ilgari shartli ravishda ozod qilish yoki jazoni oʻtashdan qasddan boʻyin tovlagan, oʻrnatilgan taqiq va cheklovlarga rioya qilmagan ayrim mahkumlarning jazo turlarini ogʻirroq jazoga almashtirish masalalari ham koʻrib chiqilmoqda.
Oʻtgan davr mobaynida mazkur talablarni bajarmagan 2 nafar mahkumning jazosi ozodlikdan mahrum qilish bilan bogʻliq boʻlgan jazo turiga almashtirildi.
Probatsiya guruhi xodimlari jinoyat sodir etib, muqarrar jazodan yashirinib yurgan kimsalarni aniqlash va qoʻlga olish boʻyicha oʻtkazilayotgan tadbirlarda ham faol qatnashmoqdalar.
Masalan, yaqinda boshqa sohaviy xizmat xodimlari bilan hamkorlikda oʻtkazilgan tezkor tadbir davomida probatsiya hisobida turgan qidiruvdagi K.B. tuman hududida ushlanib, jazo muqarrarligi taʼminlandi.
Xizmat xodimlari mahkumlar tomonidan qayta jinoyat sodir etilishining oldini olish maqsadida muntazam oʻrganish ishlarini olib borishyapti. Xususan, nazoratdagi shaxslardan 25 nafari jinoyat sodir etishga moyilligi, 14 nafarining jinoyat sodir etish xavfi yuqori ekani aniqlanib, ular bilan profilaktik tadbirlar amalga oshirildi.
Bu saʼy-harakatlar natijasida joriy yilning oʻtgan davrida probatsiya guruhi hisobida turgan shaxslar tomonidan qayta jinoyat sodir etilishiga yoʻl qoʻyilmadi.
©️ “Postda” gazetasi, Xudoybergan Jabborov.