Xavfsiz yoʻnalish. Maxsus tadbir doirasida
2025-04-23 08:00:00 / Yangiliklar
Ayni kunlarda IIV Transport va turizm obyektlarida xavfsizlikni taʼminlash departamentining tegishli koʻrsatmasiga asosan, joylarda «Xavfsiz yoʻnalish» maxsus tezkor-profilaktik tadbiri oʻtkazilmoqda. Joriy yilning 1-may kuniga qadar davom etadigan mazkur tadbir doirasida Qashqadaryo viloyati TXTB «Dehqonobod» bekatida xavfsizlikni taʼminlash boʻlinmasi shaxsiy tarkibi tomonidan ham muayyan ishlar olib borilyapti.
Tadbir davomida temiryoʻl korxona va tashkilotlari, mahallalar, taʼlim muassasalarida targʻibot uchrashuvlari oʻtkazilyapti. Bu uchrashuvlarda temiryoʻl obyektlari va ularga yaqin joylarda xavfsizlik talablariga rioya etish lozimligi uqtirilmoqda, aksincha holatlarning ogʻir oqibatlari aniq misollar yordamida tushuntirilmoqda.
Shu bilan birga, tadbir davomida bekatlar va fuqarolar oʻtishi uchun moʻljallangan joylarda harakat xavfsizligi qoidalari aks etgan bannerlar va kechki vaqtda yoʻlovchilar hamda ishchilarga qulay boʻlishi uchun yoritkich chiroqlar oʻrnatildi.
Umuman olganda, joriy yilning dastlabki 3 oyi mobaynida temiryoʻllarda harakat xavfsizligini taʼminlash, jinoyat va huquqbuzarliklarning oldini olish, turli salbiy holatlar kelib chiqishiga yoʻl qoʻymaslik maqsadida mahallalarda 52 marta, oʻquv muassasalarida 28 marta, temiryoʻl korxona va tashkilotlarida 42 marta profilaktik tadbirlar oʻtkazildi. 65 nafar fuqaro huquqbuzarlik sodir etgani aniqlanib, ularga nisbatan maʼmuriy bayonnomalar rasmiylashtirilgan, 1 nafar fuqaroga nisbatan jinoyat ishi qoʻzgʻatildi. Aniqlangan kamchiliklarni bartaraf etish yuzasidan tegishli tashkilotlarga taqdimnomalar kiritildi.
Amirxon JULANOV, kapitan.
Qashqadaryo viloyati.