Qaror va ijro. Amaliy muloqotlar va oʻrganishlar
2025-04-18 23:00:00 / Yangiliklar
Ichki ishlar vaziri oʻrinbosari, general-mayor Davron Nazarmuxamedov boshchiligidagi ishchi guruh Fargʻona viloyatida afv etilgan 59 nafar shaxs bilan uchrashuv oʻtkazib, otaliqqa olingan maktabda oʻrganishlar olib bordi.
Fargʻona va Qoʻqon shaharlarida vazir oʻrinbosari oʻtkazgan sayyor qabulda afv etilganlarning 5 nafari ish bilan taʼminlandi, 13 nafari oʻzini oʻzi band qilgan shaxs sifatida tegishli tartibda roʻyxatdan oʻtkazildi, 26 nafariga ijtimoiy moslashtirish boʻyicha moddiy yordam ajratildi, 4 nafariga ID-karta rasmiylashtirib berildi.
Barcha afv etilgan fuqarolar tibbiy koʻrikdan oʻtkazilib, yashash hududidagi mahalla raislari murabbiy sifatida biriktirildi.
Ishchi guruh otaliqqa olingan Quva tumanidagi 4-sonli umumiy oʻrta taʼlim maktabida oʻrganish ishlarini amalga oshirdi.
Dastlabki oʻrganishlar natijasida maktab binosining bir qismini seysmik va texnik jihatdan nosoz deb topilgani, zamon talablariga javob bermasligi sababli toʻliq kapital taʼmirlash, bir qismini rekonstruksiya qilish boʻyicha xulosa qilindi.
Shuningdek, vazir oʻrinbosari tomonidan maktab infratuzilmasini, oʻquvchilar uchun shart-sharoitlarni zamon talablari asosida yangilash, xavfsizlik uchun videokuzatuv kameralari va turniket moslamalarini oʻrnatish, maktab atrofini oʻrab olish kerakligi qayd etildi.
Faollar zali, fizika, kimyo, biologiya laboratoriyalari, kasb-hunarga yoʻnaltirish xonasi, ixtisoslashgan maxsus fanlar, chet-tili lingafon xonasi, saf maydoni, oshxona va yuvinish xonasi, qishki hojatxonalarni barpo etish, oʻquvchilarga tibbiy xizmat koʻrsatish sifatini oshirish borasida bir qator vazifalar belgilab berildi.
Topshiriqqa muvofiq, ichki ishlar organlari koʻmagida maktab hududida 800 ta manzarali gul va 170 ta daraxt koʻchatlari ekilib, maktab tomorqasi va uning atrofi obodonlashtirildi.
Maktab oldidagi yoʻl asfaltlanib, yoʻl chiziqlari chizildi, panjara va devorlar taʼmirlandi, chiqindilar, nosoz asbob-anjomlar olib ketildi. Va ichki ishlar organlari tashabbusi bilan maktabga 200 dan ortiq elektron kitoblar, 10 dan ortiq uslubiy qoʻllanmalar va boshqa materiallar begʻaraz yetkazib berildi.
Maktab uslubiy va taʼlim-tarbiya jarayonida amaliy koʻmak koʻrsatish uchun IIV Fargʻona akademik litseyiga biriktirilib, alohida dastur ishlab chiqilib, har haftada oʻquvchilar uchun ichki ishlar organlari masʼul xodimlari tomonidan mahorat darslari oʻtkazib borilishi belgilandi.
©️ “Postda” gazetasi, Abduvosit Sidiqov, Fargʻona viloyati.