O‘zbеkiston Rеspublikаsi Ichki ishlаr vаzirligi

“Mustaqillik” mahalla fuqarolar yigʻini Dehqonobod tumani markazida joylashgan boʻlib, aholisi asosan chorvachilik bilan nom qozongan. Kim bilan suhbatlashmang, albatta, chorva mollarini koʻpaytirish taraddudida yurganiga amin boʻlasiz. Qay bir xonadonga tashrif buyurmang, kaftdekkina joy ham boʻsh emasligini, hovlilarda 3-4 ta sigir, 5-10 ta qoʻy boqilayotganini koʻrasiz.

Mahalla guzarida qator madaniy-maishiy xizmat koʻrsatish shoxobchalari mavjud. Zamonaviy tipda qurilgan oilaviy shifokorlik punkti esa 785 ta xonadonda istiqomat qilayotgan 2870 nafar fuqaroga xizmat koʻrsatmoqda.

Mahallamizda aholi ishtirokida jinoyatchilikning har qanday koʻrinishiga qarshi murosasiz boʻlish yuzasidan muntazam uchrashuvlar oʻtkaziladi, — deydi biz bilan suhbatda mahalla fuqarolar yigʻini raisi Maxmatmoʻmin Toshpoʻlatov. — Bu tadbirlarda huquq-tartibot organlari vakillari qatnashib, fuqarolarga jinoyatchilik, ayniqsa, ekstremizm, giyohvandlik, odam savdosining salbiy oqibatlari tushuntirilmoqda.

Yoshlar va ayollar bandligini taʼminlash mahalla yettiligining doimiy diqqat markazida. Aholining qariyb uchdan birini tashkil etadigan xotin-qizlar kasanachilik, tikuvchilik kabi toʻgaraklarda hunar oʻrganishmoqda. Iroda Boʻriyeva usta tikuvchi. U bank krediti asosida tikuv mashinasi olib, oʻzini band qilishdan tashqari, 3-4 xotin-qizga kasb sirlaridan saboq bermoqda. Sabrina Xolniyozova esa turli xil pishiriqlar tayyorlash sirlarini qizlarga oʻrgatib kelmoqda.

Mahalla hududida sport bilan shugʻullanish uchun barcha sharoitlar muhayyo qilingan. Aholining oʻn foizini tashkil etadigan oʻsmirlar va yoshlar mini futbol, voleybol, basketbol, shaxmat, shashka, milliy kurash, karate, sambo kabi sport turlari bilan muntazam shugʻullanadi.

Mahallada yuz bergan har qanday nojoʻya xatti-harakat darhol oqsoqollar davrasida muhokamaga qoʻyiladi. Negaki, har narsadan oriyatni ustun qoʻyadigan mahalla ahli uydagi gapni koʻchaga chiqarmay, muammoni hal qilishni afzal bilishadi. Ichkilikbozlikka ruju qoʻygan, oila-turmush doirasida muntazam huquqbuzarliklar sodir etuvchilar, nojoiz xatti-harakatlari bilan farzand tarbiyasiga salbiy taʼsir qiluvchi ota-onalarning qilmishlari mahalla faollari, oqsoqollar bilan muhokama qilib kelinayotgani bois joriy yilning oʻtgan davrida mahallada bironta jinoyat sodir etilmadi. Shu bois mahalla “yashil” toifada.

Bunday natijalarni qoʻlga kiritishda, shubhasiz, tuman IIB JXX HPB 50/13-sonli huquq-tartibot maskani profilaktika inspektori, kapitan Lutfulla Hamidovning alohida xizmati katta. El-yurt osoyishtaligi, fuqarolar xavfsizligi yoʻlida qilingan har qanday xizmat esa beiz ketmaydi.

Kapitan Lutfulla Hamidov yaqinda Ichki ishlar vazirining buyrugʻiga binoan, muddatidan oldin “mayor” maxsus unvoni bilan taqdirlandi. Bu unga kelgusi xizmat faoliyatini yanada fidoyilik bilan olib borishida katta kuch-gʻayrat, shijoat bagʻishlashi turgan gap.

©️ “Postda” gazetasi, Sodiq Rahimov, Qashqadaryo viloyati.