O‘zbеkiston Rеspublikаsi Ichki ishlаr vаzirligi

Ziyoli oilada tugʻilish farzandlardan ota-onasiga munosib boʻlish, yaxshi oʻqib-oʻrganishni talab qiladi. Katta leytenant Matnazar Matchanov ham ana shunday oʻqimishli oilada dunyoga kelgan. Otasi — Gaibbay Matchanov hamda onasi — Sevara Durdiyeva Xorazm viloyati Xiva shahridagi 8-sonli oʻrta maktabda oʻqituvchi boʻlib ishlashgan.

Ota-onasining jiddiy nazorati va oʻzining tirishqoqligi ortidan Matnazar ham aʼlo baholarga oʻqidi. Maktabni tugatib, Toshkent Arxitektura qurilish universitetiga oʻqishga kirdi. Taʼlim muassasasini tugatib, Yoshlar ishlari agentligi Toshkent shahar boshqarmasida ishlay boshladi.

Akalari — Xorazm viloyati IIB «Dinamo» JT va SJK raisi oʻrinbosari, podpolkovnik Ergashbek Matchanov hamda isteʼfodagi mayor Ravshanbek Matchanovga havas qilib, lavhamiz qahramoni ham egniga ichki ishlar organlari formasini kiyishga ahd

qildi. Hujjatlarini Xorazm viloyati IIBga topshirib, sinovlardan muvaffaqiyatli oʻtgach, Xonqa tumani IIB HPB profilaktika inspektori lavozimida faoliyatini boshladi. Keyinchalik poytaxtning Chilonzor tumani IIOFMB HPB «Doʻmbirobod» MFY hududiga xizmat koʻrsatuvchi profilaktika inspektori sifatida faoliyatini davom ettirdi.

Hozirda esa IIBB Tashkiliy boshqarma Tashkiliy nazorat va tahlil boʻlimi katta inspektori lavozimida xizmat qilib kelmoqda.

Katta leytenant M.Matchanov vazifasiga sidqidildan yondashib, rahbariyat ishonchini qozonishga harakat qilmoqda. Hamkasblari bilan hamkorlikda poytaxt hududidagi tumanlar kesimida jinoyatchilik va huquqbuzarliklarning holati hamda kelib chiqish sabablarini oʻrganib, tahlil qilish natijasida ularning oldini olish va kurashish borasida zaruriy chora-tadbirlar ishlab chiqilishida qatnashmoqda. Bundan tashqari, u tuman IIOFMB hududiy IIB boshliqlarining xizmatda foydalanishi uchun uslubiy qoʻllanma ishlab chiqilishida bevosita ishtirok etgan. Bu xizmatlari rahbariyat tomonidan munosib eʼtirof etilgan.

M.Matchanov oilali. Turmush oʻrtogʻi Onajon Ahmedova ham egniga forma kiygan. U Islom Karimov nomidagi Toshkent «AYERO» ixtisoslashtirilgan bojxona kompleksi bojxona chegara postida faoliyat yuritadi, unvoni kichik serjant. Ularning endigina bir yoshga kirayotgan Ominabonu ismli qizi bor.

Ziyolilar hamda osoyishtalik uchun masʼul boʻlgan oilada xalqiga eng kerakli boʻlgan kadrlar tarbiya topadi. Ularning xizmati va mehnati yurtimiz tinchligi va ravnaqi uchun oʻziga yarasha hissa boʻlib qoʻshilajak.

Sarvar SOBIROV, oʻz muxbirimiz.

Toshkent shahri.