IIV Xorazm akademik litseyi oʻquvchilarining axborot texnologiyalar va kibermakon toʻgʻrisidagi bilimlarni puxta egallashlari uchun qulay imkoniyat yaratiladi
2025-04-13 11:50:00 / Yangiliklar
Oʻzbekiston Respublikasi Prezidentining “Raqamli texnologiyalar vositasida sodir etiladigan jinoyatlarga qarshi kurashish sohasi uchun professional kadrlar tayyorlash tizimini joriy etish chora-tadbirlari toʻgʻrisida”gi 2025-yil 22-yanvardagi PQ-17-son Qarori hamda Ichki ishlar vazirligining tegishli koʻrsatmasi ijrosini taʼminlash maqsadida joriy yilning 9-aprel kuni IIV Xorazm akademik litseyi va Muhammad al-Xorazmiy nomidagi Toshkent axborot texnologiyalari universiteti Urganch filiali oʻrtasida hamkorlik memorandumi imzolandi.
Mazkur memorandumga koʻra, endilikda tomonlar taʼlim va ilmiy-amaliy faoliyatni targʻib qilish va ommalashtirishda oʻzaro qoʻllab-quvvatlash va faol hamkorlikni taʼminlash, shuningdek sheriklik asosida, mavjud boʻlgan axborot, huquqiy, ilmiy va tashkiliy, oʻquv-uslubiy resurslardan foydalanish huquqiga ega boʻldilar.
Bundan tashqari raqobatbardosh mutaxassislarni tayyorlash doirasida birgalikdagi tadbirlarni rejalashtirish va amalga oshirish, shu jumladan axborot texnologiyalari, dasturlash va kiberxavfsizlik sohalarida hamda taʼlim dasturlarini hamkorlikda ishlab chiqish, amaliyotni tashkil etish, litsey oʻquvchilarini Oliy taʼlim muassasalariga tayyorlash va maqsadli yoʻnaltirishga kelishib olindi.
Oʻzaro hamkorlik natijasida akademik litsey oʻquvchilarining axborot texnologiyalar va kibermakon toʻgʻrisidagi bilimlarini yanada boyitish, 2025-2026-oʻquv yilidan kiberxavfsizlik yoʻnalishida chuqur bilim olishlari uchun yanada katta imkoniyatlar yaratiladi.
Xorazm viloyati IIB Axborot xizmati