Sport yangiliklari. Voleybol: Yangi imkoniyatlar
2025-04-12 23:00:00 / Yangiliklar
Soʻnggi yillarda mamlakatimizda sportni ommalashtirish, yoshlarning sport bilan shugʻullanishlari uchun qulay sharoitlar yaratish masalasi davlat siyosati darajasiga koʻtarildi.
Mazkur tizimli ishlarning uzviy davomi sifatida Voleybol federatsiyasining IIV Akademiyasida boʻlib oʻtgan navbatdan tashqari konferensiyasida Ichki ishlar, Sport vazirliklari, Milliy olimpiya qoʻmitasi rahbariyati, hududiy ichki ishlar organlari masʼullari, federatsiya mutasaddilari va uning hududiy vakillari, sport faxriylari ishtirok etishdi.
Konferensiyani ochib bergan Sport vaziri Adham Ikramov voleybol sport turini rivojlantirish borasida amalga oshirilayotgan ishlar natijasida mamlakatimiz nufuzli musobaqalarga mezbonlik qilayotganligi, eng muhimi, uning xalqimiz orasida ommalashib borayotganligini eʼtirof etdi.
Yigʻilishda Ichki ishlar vaziri, general-mayor Aziz Tashpulatov Oʻzbekiston voleybol federatsiyasi raisi etib saylandi. Shuningdek, bir qator viloyatlar IIB boshliqlari va Toshkent shahar IIBB boshligʻi hududiy boʻlimlar raisligiga saylandi.
Tadbir davomida Prezidentimizning 2022-yil 11-apreldagi “Mahallalarda yoshlarni ommaviy sportga jalb qilishni yangi bosqichga olib chiqish chora-tadbirlari toʻgʻrisida”gi qarori ijrosini taʼminlash maqsadida “Besh tashabbus olimpiadasi” doirasida oʻtkazilishi rejalashtirilgan sportning voleybol turi boʻyicha “Ichki ishlar vaziri kubogi” musobaqalariga tantanali start berildi.
©️ “Postda” gazetasi