O‘zbеkiston Rеspublikаsi Ichki ishlаr vаzirligi

Tungi paytda xizmatdan qaytayotgan viloyat IIB JTSB Patrul-post xizmati batalyoni 4-tumanlararo otryadi inspektori, safdor Ismoiljon Qutliboyev Shovot tumanining “Beshmergan” mahallasi hududida mol yetaklab borayotgan yigitga koʻzi tushdi. Bu holat inspektorni befarq qoldirmadi. Darhol mashinasini toʻxtatib, oʻzini tanishtirdida, yigitdan soʻradi:

— Bemahalda sigirni qayerga olib boryapsiz?

— Bozorga, — dedi yigit xavotirini sezdirmaslikka harakat qilib. — Sotmoqchiman. Roʻzgʻorga pul zarur boʻlib qoldi.

— Sigir oʻzingiznikimi?

— Boshqa kimniki boʻlardi.

— Oʻzingizniki boʻlsa, nega arqoni kesilgan?

Kutilmagan savoldan dovdirab qolgan yigit bir koʻlidagi arqonga, bir xodimga qaradida, sigirni tashlab qocha boshladi. Shubhasi toʻgʻri chiqqanidan hushyor tortgan inspektor bir zumda unga yetib oldi...

Safdor Ismoiljon Qutliboyevning hushyorligi, xizmat vazifasiga masʼuliyat bilan yondashishi tufayli shovotlik K.B.ning jinoiy qilmishi fosh etildi. Maʼlum boʻlishicha, u “Beshmergan” mahallasidagi xonadonlarning biridan sigirni oʻgʻirlab, bozorga sotgani olib borayotgan ekan.

Safdor Ismoiljon Qutliboyev ichki ishlar organlarida xizmat qilayotganiga endigina toʻrt yil boʻlyapti. Toshkent shahar IIBB JXX JTSB PPX batalyonida xizmat faoliyatini boshlagan lavhamiz qahramoni otasining betobligi sabab faoliyatini Xorazm viloyati IIB shaxsiy tarkibi safida davom ettirishni soʻrab shahar IIBB boshligʻiga murojaat qildi. Xodimning oilaviy sharoitini oʻrganib chiqqan boshqarma rahbariyati uning murojaatini qanoatlantirdi. Shundan soʻng u hozirgi xizmat joyida ish faoliyatini davom ettirdi. Mana shunga ham ikki yildan oshdi.

Joriy yilning oʻtgan davrida turli huquqbuzarliklar sodir etgan 172 nafar fuqaroga nisbatan belgilangan tartibda maʼmuriy bayonnoma rasmiylashtirgan. Mast holda jamoat tartibini buzgan 29 nafar shaxsni hushyorxonaga joylashtirgan. Shuningdek, 12 ta jinoyatning oldi-ni olishga erishgan.

Xudoybergan JABBOROV, oʻz muxbirimiz.

Xorazm viloyati.