O‘zbеkiston Rеspublikаsi Ichki ishlаr vаzirligi

Mamlakatimizda inson qadr-qimmatini mustahkamlash, huquq va manfaatlarini himoya qilish masalasiga davlat siyosati darajasida eʼtibor qaratilmoqda.

Fargʻona viloyati. Koʻp yildan beri yurtimizda yashab, uning rivojlanishiga munosib hissa qoʻshib kelayotgan fuqaroligi boʻlmagan shaxslarni fuqarolikka qabul qilish, ularning ijtimoiy-siyosiy maqomini mustahkamlash boʻyicha tizimli chora-tadbirlar amalga oshirilayotganligi ham fikrimizni isbotlaydi.

Muborak Ramazon hayiti arafasida Prezidentimizning tegishli farmoniga koʻra, koʻplab insonlar fuqarolik maqomiga musharraf boʻlishdi. Quvonarlisi shundaki, ularning 20 nafari viloyatimizda istiqomat qiluvchi shaxslardir.

Viloyat hokimi Xayrullo Bozorov fuqarolikka qabul qilingan shaxslarga ID-kartalarini tantanali ravishda topshirarkan, davlatimiz rahbari tomonidan berilgan bunday eʼtiborga javoban jonajon Vatanimiz taraqqiyoti yoʻlida sidqidildan xizmat qilib, Yangi Oʻzbekistonni yanada rivojlantirishga munosib hissa qoʻshishga chorladi.

Fuqarolik baxtiga erishganlar esa yuksak eʼtibor va gʻamxoʻrlik uchun Yurtboshimizga minnatdorlik bildirishdi.

Men bu kunni 20-yil intiqib kutdim, — deydi Beshariq tumanida yashovchi, Raʼnoxon Rahmatova koʻzda quvonch yoshi bilan. Taqdir taqozosi bilan bir muddat Tojikistonning Isfara shahrida yashashimga toʻgʻri kelgan.

Ona yurtimizga qaytgach, fuqaroligi yoʻq shaxs guvohnomasini oldim. Prezidentimizga ming rahmat, bizning iltimoslarimizni inobatga olib, fuqarolikka qabul qildi.

Bugungi quvonchimni soʻz bilan ifodalab berolmayman. 1982-yilda tugʻilgan yozyovonlik Farrux Fayzullayev ziyoli oilaning farzandi boʻlsada, haligacha pasport ololmay kelayotgandi. Buning ham oʻziga bogʻliq boʻlmagan sabablari bor, albatta.

Ota-onam oʻqituvchi boʻlgan, -deydi yigit hayajonini yashirolmay. — Sobiq ittifoq davrida Qirgʻiziston hududida yashab, oʻsha yerdagi maktablarda ishlashgan.

Mamlakatimiz mustaqillikka erishgach, Yozyovonga kelib, hozirgacha shu yerda yashashadi. Men esa Qirgʻiziston hududida tugʻilganim uchun haligacha fuqaroligi yoʻq shaxs edim. Bugun esa yurtboshimizning insonparvar siyosati tufayli jonajon Vatanimning baxtli fuqarosiga aylandim.

Menga va men qatori yurtdoshlarimizga berilgan imkoniyat va ragʻbat uchun minnatdorlik bildirib, bor kuch va gʻayratimni shu yurt rivoji uchun safarbar etishga soʻz beraman.

Surxondaryo viloyatida 56 nafar shaxs Oʻzbekiston fuqaroligiga qabul qilindi.

Shu munosabat bilan viloyat hokimligida tashkil etilgan tadbirda viloyat hokimi U. Qosimov fuqarolik maqomini olgan shaxslarga Oʻzbekiston Respublikasi fuqaroligini tasdiqlovchi ID-kartalarni topshirdi.

Uchrashuvda soʻzga chiqqanlar Oʻzbekiston fuqaroligini olish fuqaroligi boʻlmagan shaxslarga mamlakatning barcha huquq va erkinliklaridan toʻliq foydalanish imkonini berishini, ularning ijtimoiy himoyasi va huquqiy maqomini mustahkamlashga xizmat qilishini taʼkidladi.

©️ “Postda” gazetasi