Oʻzbekiston Respublikasi Prezidenti huzuridagi Davlat boshqaruv akademiyasida hududiy ichki ishlar organlari rahbar xodimlari hamda IIV Akademiyasi magistratura tinglovchilari uchun navbatdagi oʻquv-amaliy seminari boshlandi
2025-04-07 15:30:00 / Yangiliklar
Ichki ishlar organlari tizimida xizmat qilayotgan kadrlar salohiyatini oshirish hamda ularning oldiga qoʻyilgan muhim vazifalar, sohaga oid qonunchilikdagi oʻzgarishlarni yetkazish maqsadida muntazam ravishda uchrashuvlar, seminarlar va boshqa koʻplab amaliy mashgʻulotlar oʻtkazish yoʻlga qoʻyilgan.
Oʻzbekiston Respublikasi Prezidenti huzuridagi Davlat boshqaruvi akademiyasida boshlangan navbatdagi oʻquv-amaliy seminari ham jinoyatchilikka qarshi kurashish, mahalla jinoyatchiligini barvaqt oldini olish hamda energetik xavfsizlikni taʼminlash faoliyatini tashkil etishga oid bilimlarni rivojlantirish maqsadida boʻlib oʻtmoqda. Seminarda respublikaning tuman-shahar IIB boshliqlari, Tashkiliy boshqarma boshligʻining oʻrinbosarlari hamda IIV Akademiyasi magistratura tinglovchilari ishtirok etmoqda.
Bugun 7-aprel kuni boshlangan seminarni Oʻzbekiston Respublikasi Prezidenti maslahatchisi Doniyor Qodirov ochib berdi. Mamlakatimizning barcha hududlaridan kelgan, ichki ishlar organlarining asosiy boʻgʻinida rahbarlik vazifalarida xizmat qilayotgan xodimlarga seminardan koʻzlangan asosiy maqsad yetkazildi.
Ichki ishlar vaziri Aziz Toshpoʻlatov ham zamonaviy bilimlarni oʻzlashtirish, dunyoda roʻy berayotgan hodisalardan oʻrinli xulosa chiqargan holda, xizmat hududida jinoyatchilikka qarshi kurashishda tizimli ishlarni yoʻlga qoʻyish bugungi tinglovchilar oldidagi asosiy vazifa ekanligini taʼkidlab oʻtdi.
Davlat boshqaruvi akademiyasi rektori Adxam Bekmurodov moderatorlik qilayotgan oʻquv-amaliy seminari davomida yurtimizdagi barcha huquqni muhofaza qilish idoralari rahbarlari, Oliy oʻquv yurtlari hamda Akademiyaning katta tajribaga ega professorlari tomonidan maʼruzalar oʻtilishi rejalashtirilgan.