“Sogʻlom oila uchun birlashaylik” shiori ostida ommaviy sport tadbiri boʻlib oʻtdi
2025-04-05 13:25:00 / Yangiliklar
Xotin-qizlar oʻrtasida sogʻlom turmush tarzini keng targʻib qilish, ularni jismoniy faollikka chorlash maqsadida davlat rahbari tashabbusi bilan poytaxtimizdagi “Milliy bogʻ” hududida “Sogʻlom oila uchun birlashaylik” shiori ostida ommaviy badantarbiya va besh ming qadam yurish sport tadbiri tashkil etildi.
Mazkur tadbirda turli vazirlik va idoralar shuningdek ichki ishlar organlarida sidqidildan faoliyat yuritayotgan, sogʻlom hayotni qadrlovchi ayollar va qizlar ham faol ishtirok etdilar. Ichki ishlar organlari tizimida anʼanaga aylanib, doimiy ravishda oʻtkaziladigan maʼnaviyat oyligi doirasida sport bilan hamnafas xodima ayollar bajonidil ushbu tadbirga tashrif buyurdi. Tadbirni Oʻzbekiston Respublikasi Bosh vazirining oʻrinbosari, Oila va xotin-qizlar qoʻmitasi raisi Zulayho Mahkamova ochib berdi. U erta tongdan sogʻlom hayot sari intilib, “Milliy bogʻ”ga yigʻilgan barcha ishtirokchilarni qutlab, ushbu sport tadbiri nafaqat xotin-qizlar salomatligini mustahkamlash, balki jamiyatda birdamlik va ijtimoiy faollikni oshirishga xizmat qilishini alohida taʼkidladi.
Tadbir davomida ommaviy “besh ming qadam yurish”ga start berildi. Ishtirokchilar bahor nafasi ufurib turgan “Milliy bogʻ”da koʻtarinki ruhda yurish mashqlarini bajardilar. Shundan soʻng ommaviy badantarbiya mashqlari ham katta gʻayrat bilan amalga oshirildi.
Mazkur sport tadbiri barcha ishtirokchilarga sogʻlom hayotning qadri, sogʻlom oila va sogʻlom jamiyat barpo etish yoʻlida yagona maqsad sari harakat qilish zarurligini yana bir bor eslatdi.