O‘zbеkiston Rеspublikаsi Ichki ishlаr vаzirligi

Bagʻdod tumanining «Doʻrmancha» mahallasi jinoyatchilik salmogʻi yuqori boʻlgan, kriminogen vaziyat ogʻir hudud sanalardi. Oʻgʻrilik, tan jarohati yetkazish va giyohvandlik bilan bogʻliq jinoyatlar tez-tez sodir etilgani bois avvalgi yillarda «qizil» toifaga kiritilgan edi.

Joriy yilning oʻtgan davrida vaziyat tubdan ijobiy tomonga oʻzgardi.

- Uch ming nafarga yaqin aholi istiqomat qiladigan mahallamizda dehqon bozori, kiyim-kechak bozori, mol bozori, shuningdek, yana oʻnlab savdo va maishiy xizmat koʻrsatish shoxobchalari joylashgan, — deydi profilaktika katta inspektori, podpolkovnik Ulugʻbek Bektemirov. — Bu yerga tuman aholisi bilan birga, qoʻshni Rishton, Oltiariq, Uchkoʻprik, Buvayda tumanidan ham savdo-sotiq uchun kelishadi. Ayniqsa, mol bozori juda gavjum boʻlib, jinoyatchilik ham ushbu bozorlar hissasiga toʻgʻri kelardi. Jinoyatlarning sabablariga ilmiy jihatdan yondashib, uni jilovlashga qaratilgan yoʻl xaritasi asosidagi saʼy-harakatlarimiz samarasi oʻlaroq mahallamiz bugunda «qizil»dan «yashil» toifaga oʻtdi.

Katta inspektorning qayd etishicha, birinchi galda mahalla yettiligining ijtimoiy profilaktika tadbirlarini amalga oshirish boʻyicha bilimlarini oshirish maqsadida oʻquv seminarlari oʻtkazildi. Huquqbuzarlik sodir etgan shaxslarga nisbatan avtomatlashtirilgan tartibda ijtimoiy profilaktika tadbirlarini amalga oshirishga jiddiy eʼtibor qaratila boshlandi.

Aholining huquqiy ongi va madaniyatini yuksaltirish maqsadida voyaga yetmaganlar, xotin-qizlar, tarbiyasi ogʻir yoshlar hamda probatsiya hisobida turgan shaxslar bilan targʻibot tadbirlari oʻtkazildi. Muqaddam sudlangan va maʼmuriy nazoratdagi shaxslar boʻyicha «xonadonbay» ishlar tashkil etilib, 5 nafar maʼmuriy nazoratdagilardan 2 nafarining ijtimoiy muammolari hal etildi, 3 nafari ishga joylashtirildi. Raqamlashtirishga alohida eʼtibor qaratilib, bozorlar, savdo doʻkoni va rastalarga 25 ta kamera oʻrnatildi. Ulardan 15 tasi profilaktika katta inspektorining xizmat xonasiga integratsiya qilindi.

Bundan tashqari, mahallalarning asosiy kirish-chiqish joylariga 3 ta yuzni va avtoraqamlarni tanib oluvchi, maktab va maktabgacha taʼlim muassasalarining kirish-chiqish joylariga esa 2 ta kamera oʻrnatildi, 5 ta xonadon hamda 4 ta savdo doʻkoni qoʻriqlash xizmati tomonidan texnik qoʻriqlovga olindi. Koʻp qavatli uylarning kirish yoʻlaklari oldiga 2 ta tashvish tugmasi qoʻyildi.

- Hozirda «Namunaviy xavfsiz koʻcha» hamda «Namunaviy xavfsiz yoʻlak» tashkil etish boʻyicha ham jadal ish olib boryapmiz, — deydi katta inspektor. — Davlatimiz rahbarining oʻz vaqtida, uzoqni koʻzlab chiqargan qarori yillar davomida kriminogen vaziyat ogʻir hudud sanalgan bizning mahallamizga chin maʼnoda yangi nafas olib kirdi, osoyishta va xavfsiz manzilga aylantirdi.

Maʼlumot uchun, doʻrmanchaliklarning haqiqiy himoyachisi va maslahatgoʻyiga aylangan podpolkovnik Ulugʻbek Bektemirov Oltiariq tumanida tugʻilib oʻsgan. Ichki ishlar organlaridagi orttirgan 25 yillik boy amaliy tajribasini yosh xodimlarga baholi qudrat oʻrgatib kelyapti.

Abduvosit Sidiqov, oʻz muxbirimiz. “Postda”
Fargʻona viloyati