Sohaviy xizmatlarda. Oziq-ovqat xavfsizligi uchun
2025-03-31 23:00:00 / Yangiliklar
Mamlakatimizda oziq-ovqat xavfsizligini taʼminlash borasida keng koʻlamli chora-tadbirlar olib borilmoqda. Zero, oziq-ovqat mahsulotlarini ishlab chiqarish, qayta ishlash va aholi ehtiyojiga yetarli darajada, eng muhimi, sifatli holda yetkazib berish davr talabi hisoblanadi.
Toshkent shahar IIBB JTSB boʻlinmalari Karantin tadbirlarini taʼminlash guruhi xodimlari ham poytaxt Veterinariya va chorvachilikni rivojlantirish boshqarmasi hamda tumanlar boʻlimlari bilan hamkorlikda bozorlar va savdo obyektlarida nazorat tadbirlarini oʻtkazib kelishmoqda.
Shahrimiz hududida epizootik va epidemik vaziyatni barqarorlashtirish borasida hududiy veterinariya tashkilotlari hamda boshqa mutasaddi idoralar xodimlari bilan hamkorlikda bir qator chora-tadbirlar tizimli ravishda amalga oshirilmoqda, — deydi IIBB JTSB Karantin tadbirlarini taʼminlash guruhi komandiri, leytenant Azizbek Hayitov. — Yil boshidan buyon veterinariya, veterinariya-sanitariya qoidalarini buzgan 159 nafar fuqaroga nisbatan maʼmuriy bayonnoma tuzilib, jarima qoʻllanildi.
Xususan, veterinariya hujjatisiz olib ketilayotgan, kelib chiqishi nomaʼlum boʻlgan 2296 kilogramm goʻsht, 3253 litr sut, 19655 dona tuxum hamda 8307 kilogramm kalla-pocha, oʻpka, jigar, yurak, qorin kabi mahsulotlar isteʼmol qilishga yaroqsizligi tufayli utilizatsiya qilindi.
Yakkasaroy tumanidagi “Askiya” bozorida boʻlib, veterinariya-sanitariya ekspertiza laboratoriyasi xodimlari Dilafruz Yaxshiyeva va Gulchehra Shermatova hamda IIBB JTSB Karantin tadbirlarini taʼminlash guruhi xodimlari, safdorlar Jamshid Mirobidov va Mardon Iskandarovlarning faoliyati bilan yaqindan tanishdik.
Ular sotuvga chiqarilayotgan oziq-ovqat mahsulotlarining yaroqliligini tekshirayotgan ekan. Tekshirish davomida isteʼmolga yaroqsiz deb topilgan mahsulotlar savdosini cheklash, ularni zararsizlantirish va savdo majmualari hududida veterinar osoyishtalikni taʼminlash doimiy nazoratga olinganligining guvohi boʻldik.
Shu oʻrinda aytish kerakki, sifatsiz, isteʼmolga yaroqsiz mahsulotlar oʻz vaqtida aniqlanib, zararsizlantirilmasa, odamlar salomatligiga salbiy taʼsir qilishi turgan gap.
Buni yaxshi anglab yetgan Karantin tadbirlarini taʼminlash guruhi xodimlarining tegishli idora vakillari bilan hamkorlikda olib borayotgan saʼy-harakatlari oziq-ovqat xavfsizligi uchun eng muhim vazifa sanaladi.
©️ “Postda” gazetasi, Sarvar Sobirov. Toshkent shahri.