Vazirlik ishchi guruhi Buxoro viloyatida oʻrganish ishlarini olib bormoqda
2025-03-28 09:35:00 / Yangiliklar
Ichki ishlar vaziri oʻrinbosari general-mayor Baxodir Mirzaraximov boshchiligidagi ishchi guruh tomonidan harbiy xizmatchilarga dunyoda va qoʻshni davlatlarda yuzaga kelayotgan harbiy siyosiy vaziyatlardan toʻgʻri xulosa chiqargan holda sodir etilishi mumkin boʻlgan har qanday holatlarga ruhan va jismonan tayyor boʻlishlari, vatanparvar, sergak va ogoh boʻlib harbiy xizmatni olib borish zarurligini taʼkidlab oʻtdilar.
Shuningdek, harbiy xizmatchilarga yaratilgan shart-sharoitlar, xizmat olib borish jarayonlari, oʻzaro hamkorlikda olib borilayotgan ishlar bilan tanishib, kelgusidagi amalga oshirilishi lozim boʻlgan ishlar yuzasidan koʻrsatmalar berildi.
Harbiy xizmatchilarni harbiy vatanparvarlik ruhida tarbiyalash borasida serjant va ofitserlarning masʼuliyatini oshirish kerakligini taʼkidlab, boʻlinmalarda harbiy xizmatchilarga yaratilgan shart-sharoitlar va navbatchilarning xizmat olib borishi boʻyicha masʼul xodimlarga topshiriqlar berildi.
Shundan soʻng, vaziri oʻrinbosari qorovul qoʻshinlari qoʻmondonligiga qarashli 7536-sonli harbiy qismi uchun qurilayotgan yangi binoga borib, bu yerda davom etayotgan qurilish-taʼmirlash ishlarini koʻzdan kechirdi.
Shuningdek Ichki ishlar vaziri oʻrinbosari general-mayor Baxodir Mirzaraximov boshchiligidagi ishchi guruh Ichki ishlar vazirligi Jazoni ijro etish departamenti oltinchi mintaqaviy hudud 17-son jazoni ijro etish koloniyasiga tashrif buyurdi.
Vazir oʻrinbosari jazoni ijro etish muassasasida shaxsiy tarkib va mahkumlarga yaratilgan shart-sharoitlarni koʻzdan kechirib, amalga oshirilishi lozim boʻlgan ishlar yuzasidan masʼullarga tegishli koʻrsatmalar berdi.
Ichki ishlar vaziri oʻrinbosarining Buxoro viloyatidagi oʻrganishlari davom etmoqda.
IIV Transport va turizm obyektlarida xavfsizlikni taʼminlash departamenti Axborot guruhi