Jinoyatchilikni «mahallabay» jilovlash yohud Oʻzbekiston tumani IIB tajribasi
2023-12-17 11:00:00 / Yangiliklar
Jinoyatchilikni «mahallabay» jilovlash va yo‘l-transport hodisalarining oldini olish borasida Farg‘ona viloyatining O‘zbekiston tumani ichki ishlar bo‘limida muayyan tajriba to‘plangan bo‘lib, mazkur tajribalarni boshqa shahar-tumanlarga ommalashtirish maqsadida seminar-trening o‘tkazildi. Unda shahar-tuman ichki ishlar boshqarma va bo‘limlarining boshliqlari, ularning o‘rinbosarlari, soha faxriylari ishtirok etdi.
Seminar qatnashchilari viloyat Ichki ishlar boshqarmasi boshlig‘i, general-mayor Azizbek Ikramov boshchiligida dastavval tuman IIB binosida jinoyat va huquqbuzarliklarning oldini olish yo‘nalishida olib borilayotgan ishlarni o‘zida aks ettirgan ko‘rgazma bilan tanishishdi.
So‘ngra yo‘l-transport hodisalarining oldini olish maqsadida tumanda amalga oshirilayotgan innovatsion loyihalar ham namoyish etildi.
Seminarda qayd etilganidek, tuman hududida jinoyatchilikni jilovlash maqsadida keng jamoatchilik bilan hamkorlikda «xonadonbay» va «fuqarobay» tizimi asosida jinoyat qilishga moyil bo‘lgan fuqarolar, muqaddam sudlangan va profilaktik hisobda turgan shaxslardan 3 ming 912 nafarining ro‘yxatlari qayta taftishdan o‘tkazilib, ular bilan muntazam ravishda profilaktik ishlar olib borilmoqda va ta’sir choralari ko‘rilmoqda.
Tungi vaqtlarda jinoyat va huquqbuzarliklarning oldini olish maqsadida tuman IIBda tungi xizmat tashkil etilib, «Bumerang», «Avtobus» tadbirlari tashkil etilyapti. Avgust oyida boshlangan ushbu tadbirlar davomida 3 ming 600 nafardan ortiq shaxslar bilan filtr so‘rovlar o‘tkazildi.
Hozirgi kunda tuman hududida 14 ta jamoatchilik nazorati maskanlari o‘z ish faoliyatini olib bormoqda. 68 ta maktab, 57 ta maktabgacha ta’lim muassasasi va 3 ta kasb-hunar maktablarining tungi vaqtlarda qo‘riqlanishini yanada yaxshilash maqsadida ushbu o‘quv muassasa qorovullariga yorug‘lik qaytaruvchi nimchalar, hushtak va fonarlar tarqatilib, ulardan foydalanish, jinoyat va huquqbuzarliklar aniqlanganda xabar berish tartiblari bo‘yicha yo‘riqnomalar o‘tkazildi.
Bundan tashqari, tumanda videokuzatuv kameralarini o‘rnatish orqali ham sodir etilishi mumkin bo‘lgan jinoyatlarning oldini olishga erishilmoqda. Joriy yil avgust-noyabr oylari davomida «Turkiston», «Beruniy», «Bozor Yaypan», «Afg‘on», «Obod» va «Dashtcho‘lpon» mahalla fuqarolar yig‘inlarining har biriga 10 tadan, jami 60 ta videokuzatuv kameralari o‘rnatilib, profilaktika inspektorining xizmat xonasiga integratsiya qilindi. Bu, o‘z navbatida, ushbu hududlarda jinoyatchilik va huquqbuzarliklarning oldini olishda katta samara bermoqda.
Seminar davomida general-mayor Azizbek Ikramov tumandagi korxona-tashkilotlarning qorovullari bilan ham uchrashuv o‘tkazib, uchrashuv davomida ichki ishlar organlari bilan faol hamkorlik qilib kelayotgan bir guruh ishchi-xizmatchilarga sovg‘alar topshirildi. Shu yerda Milliy gvardiya qo‘riqlash bo‘limining ko‘rgazmasi ham o‘tkazildi. Ko‘rgazma davomida qo‘riqlash pultiga ulanishning afzalliklari tushuntirib berildi.
Abduvosit SIDIQOV, o‘z muxbirimiz.
Farg‘ona viloyati.