Oʻzbekiston Respublikasi ichki ishlar vaziri, general-mayor Aziz Tashpulatovning Navroʻz – umumxalq bayrami munosabati bilan tabrigi
2025-03-21 10:50:00 / Yangiliklar
Barcha ichki ishlar organlari xodimlari, harbiy xizmatchilari, taʻlim muassasalari professor-oʻqituvchilari, tinglovchi-kursantlari, soha faxriylari hamda yurtimiz osoyishtaligi yoʻlida, xizmat burchini bajarish chogʻida halok boʻlgan xodimlarning oila aʻzolarini 21-mart – Navroʻz umumxalq bayrami bilan samimiy tabriklayman.
Qadim manbalardan maʻlumki, Navroʻzi olam xalqimizning azaliy va goʻzal qadriyatlaridan biri boʻlib, uch ming yillik tarixga ega. Navroʻz – inson va tabiatni asrab-avaylashga, tinchlik, doʻstlik va hamjihatlik kabi umumbashariy qadriyatlarni eʻzozlashga chorlaydigan yangilanish va yasharish bayrami ekanligi bilan koʻngillarga iliqlik olib kiradi.
Ana shunday ezgu fazilatlarga ega Navroʻz nafaqat mamlakatimiz, balki Sharq olamida zamonlar osha yashab kelmoqda. Shu boisdan ham Navroʻz yurtimizda istiqomat qilayotgan 130 dan ziyod millat va elat vakillarini bir jonu bir tan qilib birlashtiradigan qutlugʻ ayyomga aylandi.
Muhtaram Prezidentimiz Shavkat Miromonovich Mirziyoyev taʻkidlaganlaridek: “Navroʻz hammamizga insoniylik, mehr-oqibat va bagʻrikenglik fanidan saboq beradi. Shu fayzli lahzalarda barchamiz tinchlik va osoyishtalik naqadar bebaho neʻmat ekanini, uning qadr-qimmati va ahamiyatini yaxshi anglaymiz. Bugungi murakkab dunyoda xalqimiz hayotini, farzandlarimiz kelajagini, musaffo osmonimizni asrab-avaylash uchun har birimiz masʻul va javobgar ekanimizni yanada chuqurroq his etamiz”.
Joriy yilda ham Navroʻz umumxalq bayramiga bagʻishlangan barcha tadbirlar azaliy anʻanalarimizga mos holda “Qadriyatlaring boqiy boʻlsin, Navroʻz!” degan bosh gʻoya asosida keng nishonlanmoqda.
Ushbu qutlugʻ ayyom soʻnggi yillarda Yangi Oʻzbekistonimizda amalga oshirilayotgan “Inson qadri uchun, inson baxti uchun”, degan olijanob gʻoyaga hamohang boʻlib, tom maʻnoda umumxalq bayramiga aylandi.
Qadrli hamkasblar hamda aziz faxriylar!
Bayram arafasida har biringizga yurt tinchligi, osoyishtaligi va ravnaqi yoʻlida olib borayotgan yuksak xizmatingiz uchun minnatdorlik bildirib, kelgusidagi masʻuliyatli va sharafli faoliyatingizda ulkan muvaffaqiyatlar tilayman.
Navroʻz har bir oila, har bir xonadonga quvonch, fayzu-baraka olib kelsin!
A.A. Tashpulatov
Oʻzbekiston Respublikasi Ichki ishlar vaziri,
general-mayor.
2025-yil 21-mart