Joriy yilning 12-mart kuni Bosh prokuraturada jinoyatchilik va huquqbuzarliklarning oldini olish chora-tadbirlariga bagʻishlangan respublika idoralararo yigʻilishi boʻlib oʻtdi
2025-03-12 21:15:00 / Yangiliklar
Videoselektor tarzida oʻtkazilgan mazkur yigʻilishda Parlament va Hukumat aʼzolari, sohaga masʼul vazirlik va idoralar, nodavlat-notijorat tashkilotlari rahbarlari va masʼul xodimlar, viloyat, tuman-shahar hokimlari, Respublika va hududiy idoralararo muvofiqlashtiruvchi shtab va ishchi guruh aʼzolari ishtirok etishdi.
Yigʻilishda Oʻzbekiston Respublikasi Prezidentining 03.01.2025-yildagi “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish chora-tadbirlari toʻgʻrisida”gi PQ-1-son qarori ijrosi ahvoli, yoʻl qoʻyilgan xato va kamchiliklar birma bir koʻrib chiqildi.
Shuningdek, Korrupsiyaga qarshi kurashish Milliy kengashi yigʻilishida Davlat rahbari tomonidan berilgan topshiriqlar ijrosini tashkil etish masalalari muhokama qilindi.
Tanqidiy ruhda oʻtkazilgan yigʻilishda jinoyatchilik va huquqbuzarliklarning oldini olishda yoʻl qoʻyilgan xato-kamchiliklar aniq raqamlar va misollarda koʻrsatib oʻtilib, galdagi vazifalar belgilab olindi.
Jumladan, namunali xavfsiz yoʻlak va koʻchalarni tashkil etish, mahallalarni toʻliq videokuzatuv bilan qamrab olish, aholining huquqiy ongini oshirish, “mahalla yettiligi” tomonidan “ijtimoiy profilaktika” tamoyili asosida faoliyatni yanada jadallashtirish, har bir “qizil” va “sariq” toifali mahallalar boʻyicha manzilli chora-tadbirlar ishlab chiqish boʻyicha masʼullarga aniq topshiriqlar berildi.
Tadbir davomida hududlar hamda respublika idora va vazirliklarning rahbarlari, masʼul xodimlari tushuntirish va axborotlari eshitildi.
Respublika idoralararo yigʻilish yakunida mavjud kamchiliklarni bartaraf etish va muhokama qilingan sohalarda faoliyat samaradorligini oshirishga qaratilgan qaror qabul qilindi.
Bosh prokuratura