Buxoro viloyati IIB boshligʻi Ikromjon Tursunov Gʻijduvon tumanidagi “Toshloq” va “Oqrabot” mahallalarida amalga oshirilayotgan chora-tadbirlar bilan tanishdi
2025-03-03 10:10:00 / Yangiliklar
Viloyatda Prezident qaroriga asosan 55 ta ogʻir toifali mahallalarda huquqbuzarliklarning oldini olish va xavfsiz muhit yaratish boʻyicha ishlar olib borilmoqda. Ushbu mahallalarda infratuzilmani yaxshilash, tozalash-obodonlashtirish, ijtimoiy muammolarni hal etish hamda aholi bandligini oshirishga qaratilgan saʼy-harakatlar jadallashtirilgan.
Shuningdek, boshqarma boshligʻi mahalla faollari va aholi bilan muloqot qilib, ularning muammolarini oʻrgandi. “Kambagʻallikdan farovonlik sari” dasturi doirasida tadbirkorlik va hunarmandchilikni rivojlantirish, xonadonlarda kichik issiqxonalar barpo etish hamda ishsiz fuqarolarni daromadli ish bilan taʼminlash boʻyicha koʻrsatmalar berildi. Bundan tashqari, “Xavfsiz koʻcha” va “Xavfsiz yoʻlak” loyihalari asosida yoʻl harakati xavfsizligini oshirish hamda videokuzatuv tizimlarini kengaytirish masalalari ham koʻrib chiqildi.
Hududda ekologik holatni yaxshilash va obodonlashtirish ishlari doirasida “Yashil makon” loyihasi asosida daraxt ekish, ariq va zovurlarni tozalash, betonlashtirish kabi tadbirlar amalga oshirilmoqda. Belgilangan vazifalarning bajarilishi doimiy nazoratga olinib, bu kabi oʻrganishlar davom ettirilmoqda.
Buxoro viloyati IIB Axborot xizmati