IIV Akademiyasi tomonidan mahallalarning kriminogen vaziyatini oʻrganish va yaxshilashga qaratilgan oʻrganishlar izchil davom ettirilmoqda
2023-11-30 14:00:00 / Yangiliklar
Shu kunlarda taʼlim muassasasi rahbari Rustam Xatamov boshchiligidagi tajribali professor-oʻqituvchilar Qashqadaryo viloyatiga jalb qilingan. “Mahallabay” tizim asosida olib borilayotgan oʻrganishlar davomida hududlar, ayniqsa “qizil” toifadagi mahallalar ahvoli, sodir etilgan jinoyatlarning sabab va shart-sharoitlari, oʻziga xos xususiyatlari ilmiy-amaliy yondashuvlar asosida tahlil qilinmoqda.
Xususan, Qarshi tumanining “Oʻzbekiston mustaqilligi”, “Ravot”, “Qovchin”, Kasbi tumanining “Mugʻlon”, “Gʻalaba” hamda Qarshi shahridagi “Mahallot”, “Tabassum”, “Qarliqxona”, “Amir Temur”, “Geolog”, “Naxshob”, “Batosh”, “Ravoq”, “Gʻafur Gʻulom”, “Shodlik” mahallalarida boʻlib oʻtgan uchrashuvlar koʻplab masalalarga oydinlik kiritdi.
Muloqot chogʻida jinoyatchilikni jilovlash, aholi bilan manzilli ishlash va ijtimoiy profilaktika yoʻnalishida amalga oshirilayotgan ishlar muhokama qilindi. Mahallar faollari, “yettilik” aʼzolarining fikrlari tinglandi.
Huquqbuzarliklarning barvaqt oldini olish, kriminogen vaziyatga taʼsir koʻrsatayotgan omillarni bartaraf etish va yechimini kutayotgan boshqa muammolar yuzasidan masʼullarga tavsiyalar berildi.
Ishchi guruhning viloyatdagi safari davomida tuman (shahar) ichki ishlar organlari boshliqlari oʻrinbosarlari uchun oʻquv mashgʻulotlari ham oʻtkazilmoqda.
Unda tizim faoliyatini xalqchil tamoyillar asosida tashkil etish va boshqarish boʻyicha rahbarlarga qoʻyilgan dolzarb talablar, jinoyatchilikni jilovlashning samarali mexanizmlari yetkazilmoqda.
Bir soʻz bilan aytganda, “mahallabay” tizim asosida amalga oshirilayotgan oʻrganishlar hududlarning kriminogen vaziyatini yaxshilashga, eng muhimi, xalq bilan ochiq muloqot qilishga imkon bermoqda.
IIV Akademiyasi Axborot xizmati