O‘zbеkiston Rеspublikаsi Ichki ishlаr vаzirligi

Katta serjant Hojiakbar Hasanov oʻz kasbiga masʼuliyat bilan qaraydi. Shuning uchun boʻlsa kerak, qiyinchiliklar bilinmaydi. U bugungi kunda poytaxtimizning Shayxontohur tumani IIO FMB Axborot texnologiyalarini joriy etish guruhi muhandisi lavozimida faoliyat yuritib kelmoqda.

Toshkent aloqa kasb-hunar kollejida tahsil olib, oʻz sohasini puxta egallagan lavhamiz qahramoni mehnat faoliyatini ichki ishlar organlarida boshladi. Mana, shunga ham 17-yil boʻldi. Bu orada u ustozlari va hamkasblaridan oʻrganganlarini amaliyotda qoʻllab, tajriba toʻpladi.

Hojiakbar tuman IIO FMB hamda 5 ta IIB navbatchilik qismlari, xodimlarning xizmat xonalarida kompyuter texnologiyalari va aloqa tizimidagi mavjud kamchiliklarni bartaraf etib, lokal tarmoqqa toʻliq ulanishda bevosita ishtirok etdi. Hozirda barchasida bosqichma-bosqich profilaktika ishlari olib borilmoqda.

Shuningdek, tuman hududida joylashgan “Shodlik” hamda “Gulbozor” MFY hududida jinoyatchilik va huquqbuzarliklarning oldini olish uchun hamkasblari bilan birgalikda shu ikki mahallaning bir qancha ahamiyatga molik nuqtalariga “Face ID”, “PTZ” hamda boshqa turdagi kuzatuv kameralarini oʻrnatib, ularni Toshkent shahar IIBB Yagona tezkor boshqarma markazi “Qalqon” dasturiga integratsiya qilishdi.

Profilaktika inspektorlari vakolatiga kiruvchi maʼmuriy huquqbuzarliklar boʻyicha ish yurituvni toʻliq elektron shaklga oʻtkazish va ularning sud majlislarida masofaviy tarzda qatnashish amaliyoti joriy etilishi munosabati bilan Oliy sudning “E-XSUD” axborot tizimi IIVning “Maʼmuriy ish” yagona axborot tizimi bilan toʻliq integratsiya qilingan.

Sud jarayonlarini masofaviy tarzda oʻtkazish maqsadida tumandagi 5 ta IIBda “onlayn sud” tizimi ishga tushirildi. Bunda ham katta serjant H. Hasanovning munosib hissasi bor. U bundan faxr hissini tuyadi.

©️ “Postda” gazetasi, Sarvar Sobirov, Toshkent shahri