Buxoro viloyati Ichki ishlar boshqarmasi boshligʻi polkovnik Ikromjon Tursunov viloyat 3-sektoriga qarashli Shofirkon tumanida oʻrganishlar olib bordi
2025-02-27 09:00:00 / Yangiliklar
Xabaringiz bor, Buxoro viloyati 3-sektor rahbari Ichki ishlar boshqarmasi boshligʻi Ikromjon Tursunov hududlarda boʻlib, joylarda amalga oshirilayotgan keng koʻlamli ishlarning borishini koʻzdan kechirib, zaruriy chora tadbirlar belgilab kelmoqda.
Xuddi shu maqsadda, bugun kunning ikkinchi yarmida, Boshqarma boshligʻi Shofirkon tumani sektor rahbarlari va mahalla “yettiligi“ bilan birgalikda “Sultonod“ mahallasining Koʻlobod qishlogʻida oʻrganishlar olib bordi.
Mahalla hududi boʻylab xonadonma-xonadon, koʻchama-koʻcha yurib, tomorqadan unumli foydalanish, chorvachilik, parrandachilikni rivojlantirish, issiqxona xoʻjaliklarini yaratish orqali aholining kam taʼminlangan qatlami daromadlarini oshirish borasida oʻzining tegishli topshiriq va tavsiyalarini berdi.
Shuningdek, mahalla aholisini qiynab kelayotgan ijtimoiy va maishiy muammolarini ham oʻrganib, aniqlangan masalalarni bartaraf etish, hududni ijtimoiy-iqtisodiy rivojlantirish, infratuzilma holatini yaxshilash yuzasidan koʻrsatmalar berdi.
Mahallaning ichki yoʻl va koʻchalarida “Xavfsiz yoʻlak“ va “Xavfsiz koʻcha“ tamoyillari asosida manzilli ishlarni tashkillashtirib, harakat xavfsizligi choralarini koʻrish borasida ham topshiriqlar berildi.
Bundan tashqari xonadonlarda, yoʻllar va ichki koʻchalarda tozalash, obodonlashtirish, “Yashil makon“ umummilliy loyihasi doirasida manzarali va mevali daraxt koʻchatlarini ekish, hududda faoliyat olib borayotgan fermer xoʻjaliklarining qishloq xoʻjaligi yerlarida, bogʻ va tokzorlarda bahorgi agrotexnik tadbirlarni jadallashtirish yuzasidan ham tavsiyalar berildi.
Bu kabi oʻrganishlar kunlik reja asosida davom ettirilmoqda.
Buxoro viloyati IIB Axborot xizmati