IIV akademiyasiga Qozogʻiston Respublikasi Ichki ishlar vazirligining Olmaota akademiyasi rahbari Kalijan Koblandin boshchiligidagi delegatsiya tashrif buyurdi
2025-02-26 12:25:00 / Yangiliklar
Oʻzbek va qozoq xalqlarini mustahkam rishtalar bogʻlab turadi. Ikki qardosh millat azal-azaldan yaqin va inoq doʻst, bir-biriga yelkadosh qoʻshni boʻlib kelgan. Olmaota akademiyasi vakillarining yurtimizga tashrifi ham oʻquv dargohidagi “Doʻstlik bogʻi”dan boshlandi. Mehmonlarga bogʻning barpo etilish tarixi, hamkorlar oʻrtasida doʻstona munosabatlarni rivojlantirishdagi ramziy ahamiyati soʻzlab berildi.
Shundan soʻng delegatsiya aʼzolari axborot-resurs markazi, sport majmuasi, kursantlar turar-joyi hamda maxsus jihozlangan mobil transport vositalarini koʻzdan kechirdilar. Keyingi yillarda amalga oshirilgan ulkan yangilanishlar, taʼlim jarayoniga tatbiq qilingan eng ilgʻor yondashuvlar, istiqbolli loyihalar natijasida erishilgan yutuqlar haqida maʼlumot berildi. Jahonning nufuzli tashkilotlari va turdosh taʼlim muassasalari bilan yoʻlga qoʻyilgan xalqaro aloqalar namoyish qilindi.
Muzokaralar zalida boʻlib oʻtgan ikki tomonlama uchrashuvda hamkorlikni kengaytirish masalalari atroflicha muhokama qilindi.
IIV akademiyasi boshligʻi Rustam Xatamov mehmonlarni qutlab, davlat rahbarlarining saʼy-harakati bilan oʻzaro munosabatlarimiz yuksak darajaga koʻtarilgani, manfaatli hamkorlik barcha sohalarda, shu jumladan, taʼlim muassasalari oʻrtasida ham izchil rivojlanayotganini taʼkidladi. Oʻz navbatida, Olmaota akademiyasi boshligʻi Kalijan Koblandin manfaatli aloqalarni yanada kengaytirish va sifat jihatdan boyitish tashrifdan koʻzlangan asosiy maqsad ekanligini alohida eʼtirof etdi. Uning aytishicha, bugungi kunda taʼlim har bir mamlakat uchun strategik sohalardan biriga aylandi. Oʻzbekistonning yetakchi oliygohlari bilan oʻzaro integratsiyani kuchaytirish kadrlar tayyorlash jarayoniga zamonaviy yondashuvlarni keng tatbiq qilishga xizmat qiladi.
Samimiy muloqot chogʻida koʻplab masalalar yuzasidan fikr almashildi. Taʼlim muassasalari rahbarlari ilgʻor tajribalarni oʻrganish va manfaatli hamkorlikni yanada kengaytirishga ishonch bildirdilar.
Kunning ikkinchi yarmida mehmonlar Taʼlim sifatini monitoring va nazorat qilish markazi, bakalavriat va magistratura uchun moʻljallangan oʻquv binolari hamda Maʼnaviyat va maʼrifat markazi faoliyati bilan tanishdilar. Aytish joizki, taʼlimni raqamlashtirish, nazariya va amaliyotni taʼminlash, ichki ishlar organlari uchun boshqaruv kadrlarini tayyorlash, yoshlarning vatanparvarlik ruhini yuksaltirish borasida olib borilayotgan keng koʻlamli ishlar, ayniqsa taʼlim sifati va samaradorligini oshirishga qaratilgan yangi mexanizmlar delegatsiya aʼzolarining eʼtirofiga sazovor boʻldi.
IIV akademiyasi Axborot xizmati