IIV Akademiyasida Xalqaro ilm-fan sohasidagi xotin-qizlar kuni munosabati bilan olima ayollar, taʼlim muassasasi professor-oʻqituvchilari va kursantlar ishtirokida davra suhbati boʻlib oʻtdi
2025-02-20 10:00:00 / Yangiliklar
Tadbirni Akademiya boshligʻi oʻrinbosari Bobur Dadajonov kirish soʻzi bilan ochib, mamlakatimizda soʻnggi yillarda xotin-qizlarning ijtimoiy va siyosiy hayotdagi rolini kuchaytirishga alohida eʼtibor qaratilayotganligi, natijada ayollar jamiyatimiz hayotining barcha sohalarida yetakchi oʻrinlarni egallab, taʼlim, madaniyat va ilm-fan rivojiga oʻz hissalarini qoʻshib kelayotganligini taʼkidladi.
Davra suhbatida IIV Maʼnaviy-maʼrifiy ishlar xizmati boshligʻining xotin-qizlar masalalari boʻyicha oʻrinbosari Nargiza Mirjalolova, IIV Huquqbuzarliklar profilaktikasi xizmati boshligʻi oʻrinbosari Umida Abdullayeva, Toshkent davlat yuridik universiteti, Davlat va huquq kafedrasi professori Feruza Muhitdinova, “Sharq ayoli” xalqaro ayollar jamgʻarmasi raisi Saodat Tursunbayeva, IIV Akademiyasi Huquqbuzarliklar profilaktikasi faoliyati kafedrasi professori Adina Zakirova, Maʼmuriy huquq kafedrasi professori Soraxon Axmedova hamda Davlat-huquqiy fanlar va inson huquqlarini taʼminlash kafedrasi boshligʻi Karine Djavakovalar soʻzga chiqishdi.
Tadbirda soʻz olganlar “Gender tengligi toʻgʻrisidagi qonun – kim uchun?”, “Oʻzbekistonda ayollarning tazyiq va zoʻravonligini oldini olishda tizimli ishlash samaradorligi”, “Ayollar huquq va erkinliklarini taʼminlashning kafolatlari”, “Ilmiy tadqiqotlarda ayollar faolligini oshirish”, “Grant va ilmiy-tadqiqotlarni rivojlantirishda axborot texnologiyalarini oʻrni” va “Hamma narsa ayollarning oʻz qoʻlida” kabi mavzularda maʼruza qildilar.
Ishtirokchilar tomonidan jamiyatda xotin-qizlarga tazyiq va zoʻravonlikka nisbatan murosasizlik muhitini yaratish, ularning huquqlari va qonuniy manfaatlarini taʼminlash, ijtimoiy-siyosiy faolligini oshirish, iqtidorli yosh xotin-qizlarni aniqlash va ularning qobiliyatlarini toʻgʻri yoʻnaltirish kabi masalalarda fikrlar almashildi.
Tadbir yakunida ilm-fan sohasida faolligi bilan oʻrnak boʻlib kelayotgan bir guruh xotin-qizlar Akademiya boshligʻining buyrugʻi bilan qimmat baho sovgʻalar bilan mukofotlandi.
IIV Akademiyasi Axborot xizmati