Oʻzbekiston delegatsiyasining Janubiy Koreyaga tashrifi: Vatandoshlarga gʻamxoʻrlik va amaliy yordam
2025-02-16 09:00:00 / Yangiliklar
Maʼlumki, joriy yilning 5-12-fevral kunlari Oila va xotin-qizlar qoʻmitasi rahbariyati, Oʻzbekiston Respublikasi Prezidenti Maʼmuriyati, Vazirlar Mahkamasi, Tashqi ishlar vazirligi, Ichki ishlar vazirligi, Migratsiya agentligi, “Vatandoshlar” jamoat fondi vakillaridan iborat Oʻzbekiston Respublikasi delegatsiyasi amaliy tashrif bilan Janubiy Koreya Respublikasida boʻlishdi.
Safardan koʻzlangan asosiy maqsad – bu mamlakatda oʻqish, ish yuzasidan boʻlib turgan yurtimiz fuqarolarining yashash va mehnat sharoitlarini oʻrganish, shaxsini tasdiqlovchi hujjatlarini yoʻqotib yoki boshqa sabablar bilan qiyin ahvolga tushib qolgan, ijtimoiy koʻmakka muhtoj vatandoshlarimizga amaliy yordam koʻrsatishga qaratilgandi.
Nufuzli delegatsiya tarkibida qatnashgan Toshkent shahar IIBB HPB boshligʻining oʻrinbosari Xotin-qizlar masalalari boʻyicha boʻlim boshligʻi, podpolkovnik Shirin Normatova ham sayyor qabullarda faol ishtirok etib, bu kabi masalalarni oʻrganib, tegishli taklif va yordami bilan koʻplab fuqarolarimizning muammolariga yechim topishiga hissa qoʻshdi.
Delegatsiya vakillarining saʼy-harakatlari bilan 11 nafar yurtdoshlarimizga aviachiptalar olib berildi, fuqarolik pasportlarini yoʻqotganlarga “Vatanga qaytish sertifikatlari” rasmiylashtirilib, ular yurtimizga qaytarildi.
Bu boradagi ishlar izchil davom ettiriladi.
Toshkent shahar IIBB Axborot xizmati